المراة في الشعر الشعبي

مرحبا بك أيتها الفاضلة/ حنين الحجازي في منتدى بدو ليبيا
لك منا أفضل تحية وترحيب ونتمنى تنبسطي معنا وتجدي كل مايروقك
من خلال تصفحك للمساهمات والردود والمشاركات المختلفة بين الأعضاء
فأهلا وسهلا مرة ثانية...لك مودتنا وإحترامنا الشديد.
واليك بعض من ماطلبتيه عن أبيات شعرية عن الرحى.


مقتطفات من غناوي الرحى:

مدام ولدي حي يا سعدودي .. نوار قبرعون فوق خدودي

صامت قليل الملح ما يتعدّى .. برّك احدانا ناقته وتغذّى

مشيت للبحر نشكي من كبر هبالي .. حتى البحر وخّر ووجعه حالي

يا عيون مصبركم على غاليكم ... كيف ترقدوا نوم الهني ويجيكم

يا نفس توبي وارجعي للمولى ... راهو وراك القبر مشنى طوله
لو تندري يا نفس شن يطرالك ... تنوحي على روحك العمر بطوله .

ياعين خليك منه كثر البكي والغريدي ، إمغير أطلبي فضل مولاك ، يقرب زول من تريدي .

الشاهي شربته والغدي متغدي .. امغير خاطر عليا شبحكم يا ودي

غنيت ماباش الغني يغنيني ... وسكتت مابا خاطري يهنيني

ياقلب دس الموجعة واحملها ... يحطوك سارح واجلتك كملها

ياخوي راني وخيتك تلقاني ... ونلقاك للعازات طول زماني

لا تضربوني لا تقولوا سابت ... سلم ولد باباي وأمي جابت

يعطيك البلي ياموت ياخوّانة ... رفعتي ربيع العمر من بحدانا

ياحوش بعد الشايبة والشايب ... واللي طمع بالخوت طمعه خايب

نضحك مع الطربان غير انساعد ... نعرّي على سنوني وحزني قاعد

يا ميمتي رحي الرحـى والجرّة ... خذوا صحتي وخلّو عروقي برا

جيت نشكيلك تعالى اشكيلي ... واللي طرالك يا ولد طاريلي

ياقلب صدقتك على الكوّاية ... وقلت آآه ماهوّن عليّــا دايـــا

تحزمت بيكم درتكم في عوني ... نحساب حملي خفّ ... ثقلّـتونــي

الودن تسمع والعقول توازن ... والعين تشبح والقلوب مخازن

الصبر لله والرجاء في المولى ، مع الصبر ماعندي كلام انقوله

الزين ديمه زين ما يتوارى ... والعِـفـن في الشـدّة تبـان عـواره

واحد فراقـه مُـرّ شيـح وجَعْــَدة ... وواحد إذا فـارق إنديروا وَعْده

سلّـم وليـدي قال شنهـو تـبي ، مدام راسي حـي ما تـنْـكبّي

واحد يحلّـك من قفال حديدك ، واحد على هـمّ الزمـان يزيـدك

دمعات نزلوا من العيــون سخـونه ، الخـد إنكْـوى منهـم تـغـيّـر لونـه

الشـين ما باش القلب إيرومه ... والزين دارولي عليه خصــومـه

يا طير بجناحات بَـرّة بـَرّة .. سلّم على وليـدي اطناش المـرّة

واحـد كـلامـه عسـل في صونيـة ، وواحـد كلامـه مـوت تُخـنـق فـيّا ، وواحد كلامـه عسل في قيشاني ، وواحد كلامـه غير ضرب معاني .

اللـي غـرس وما جـنّـس الـزريـعـة ، ينـدم على غـرسـه نهـار يـبـيـعه

سيدي المرابط وَعْدتك نعطيها .. وعفسة أوخَيّ في الوطا نجيها
سيدي المرابط وَعْدتك بلحمها .. وعفسة أوخَيّ في الوطا سلّمها

تمنيتلك يا قلب ما تتمنى ، حجة وتوبة والصلاة والجنة

واحـد كما البحـري رطـيب جواره ، وواحـد كما القـبلي صـهـايـد نـاره

شكرا جزيلا على هذا الترحيب اللطيف انا مسروة جدا لاني ساكون صديقة لكم
و سلمت يداك علي هذي الابايت الرائعة

الله يعينهم لولاف اخطرو عاونوني عالرحى