ما هناك شىّ جديد ** امفيت للحب وحود داروا عيد

ليس هناك جديد غير.. ( عيد الحب) .. بين مؤيد ومعارض .. حبيت ننقلكم الرأى والرأى الآخر بدون تحيز .

( ملكيتى )

محمد الجرارى.



**



ما هناك شىّ جديد ** امفيت للحب وحود داروا عيد





**





وما هناكشى اخبار ** امفيت الحب قالوا عيد دار





يفرح ويزهى فيه كل محتار ** ويبقى على العشاق يوم سعيد





يضوّى علينا ّ تقول ضىّ فنار ** ومن دواعى العصر والتجديد





ويبقى فرح ما كيف هضا صار ** الحب شاملنا وما ف الحياه وحيد





ولاهناكشى لوعه ولا تشيط النار ** ويجيه كل من عنده حبيب بعيد





لاهناك مجروح ولا جرح سطّار ** ولاعاد يدمى ولا يريد ضميد




ولا عاد تسمع ف الحبيب اشعار ** ولا نقولوا فى هجر الحبيب قصيد




وبين الحبايب ما نقز نقّار ** وما حطّم الغيّات ياس عنيد





وتلقى البنات امصبيات اسطار ** ومنهن اتنقّى اللى غلاها اتريد





ويبقى تقدم دوم باستمرار ** نبقوا كما (رومه) و( لندن) وكى (مدريد )





والحاله تمام ايروّقن لافكار ** وكل من طالب حبيب ايصيد





وخرين قالوا عليك ذنب يا ستّار ** ليش التّبع للغرب والتقليد





هذين قالوا اعياد للكفّار ** وما يتبع الكفار غير بليد





هضا هوان وذل وانحدار ** للغرب تميتوا اتقول عبيد





نسيتوا كلام النبى المختار ** وتبّعتوا كلام الحب و(اكيوبيد)





جبتوا عوايد من ورا لبحار ** وبعتوا كلام الله بسعر زهيد





بلاش الفساد وليش لستهتار ** راهو عليكم " رقيب عتيد"





تريدوا الصراحه راه عيب وعار ** وفيه انحلال وشىّ غير مفيد





لو كان جبتوا ف العلوم اسرار ** ولاَّ اختراعتوا اختراع يكون فريد





لكن العبتوا بنار يا شطّار ** ومع اللعب ما ينفع الاَّ التهديد





ايجوكم اعويله امسميين ابرار** شداد العزايم والقلوب حديد





كلتم امدرب للعدا طقّار ** وكلتم امسمى للجواد حفيد







**





ما هناك شىّ جديد ** امفيت للحب وحود داروا عيد












***

صحيت خوي بوارميميح

دائماً متألق ..

ودائماً ترسم لنا كل ما تراه بكلماتك

العذبة ...

وياريت ماعدش تطول علينا ..