الشاعربشير التمامي غيّتـي الجديده .

الشاعر : بشير التمامي

غيّتـي الجديده .. هينم عليها ياس جت طوع إيده …كيف لوّلـه

درتها بالدرقه
كيف لوّله جت خاتمتها فرقه

علي قيس لذع الحرق جدّت حرقه
تبيعة فراق العين للي تريده

جاحدها علي لخرين ورقه ورقه
اذبل ربيعها وصافت بعد توريده

عانيت نفس الألم نفس الشرقه
نفس الوجع بالزبط والتنكـيده

استاصل الياس الشوق حيد عرقه
وطبنا اطياب العيش عالتكسـيده

جيت بطوعي
إغلي عليّ غاليته وهدّا روعي

غلا كبير في عيني وبين اضلوعي
تفائلت بيه ايريدني ونريده

وميعادنا بالزبط شبـه اسبوعـي
من لربعاء للأربعـا الجديده

دكنوني علي عيون العرب موضوعي
عايش الواقع في أحلام سعيده

نسّاني اللي فيهم افشل مشروعي
وكل يوم في وصفه اندير قصـيده

قصيدة ارياف أمخضبه بدموعي
مليانه حنين وشـوق لمواعـيده

وهو يحضني بحنان برّد لوعـي
مساح دمع شـوق العين في تهميده

الياس ظلم قلّعهن اجذور افروعي
واستحوذ علي حلمي وقصّر قـيده

اتقول لا حفرت ولا نتق جربوعي
امروحاتلي لنظار فار حصـيده

فيه اندرّق
ربيع خاطري هينع وعوده ورّق

خايف اعيون الناس فيه اتحرق
ما من اللي من عين فارق ريـده

انحاحي وجاحده انجي مدرّق
ملول في اقعادي نا وشوف الجـيده

ونمشي ونا مازلت فيّ محرّق
لهيب شوق ما طفّن السن تصهـيده

امسيطر علي وضعـي الهم امفرق
فرحان جاحدها امصوقر صـيده

غدر بـي اليـاس بسـهم فيّا مرّق
لا لي خبـر لا علـم بالتجريــده

اقباله انحش مني الداله شــرّق
مكتـــوبلي نزمط مراير كـيده

لو كانـّي ماني امتاع أخــــورّق
أهـناك من ايجي لنار و يحط ايــده

حكلّي عنها
وقـالن بكـت وادموعها أغلبنها

علي قول هاللّي كانن معها رنها
ورَّم جفنها من دمع بتهدهـيده

خذت ليـلها تنحب بعد خلّنها
وباتـت .. وما باتت الا بشديده

وفي الصبح طار السو حيّد منها
غلاي طـل ثاريتا الشمـــس اتبـيده

وألتمّن عليـها ويــدّها حنـّنها
ما تقول عاهـدت بيها اعهود عهيده

وكلمة الياس بنقرشه أرسمنها
وفيّ قطّعن عرق الغلا ووريـده

وفي طربخانه هايله زفـّنها
اتقول يا قريني امشيّعات همـيده

وأحفرن قبرها في داخلي أردمنها
هذيك هي نهاية قصتي الفريـده

ملاذ كل عاشق بكيته ضامنها
درتلها مزار لمن امفارق ريـده

وعندا عواطف صادقا دافنها
وخبرة اجروح ودمع وتبغديده

ويعرف اطناشر نوع واملحّنها
العَبرَه اللي تقطيع بالتنهــيده

وماتن احلامه ولوعته كفـّنها
ومخزون احتماله علي الحديد رصـيده

ومن كثر نوبات الوجع أتقنها
رعشة ذبول الروح ليلة عـيده

هاضاك هو اللي ممكن اوجاعي منها
يوصل لربع الألم والتنكـيده

الاّ نا بعَدها لوعتي حاقنها
بسموم وتلاشي امل عالتكبـيده

أمرافق الليل وغيتا ما منها
أبخص كانهو ظلّم عليّ هويــده

غيّة النساء غافل اللي يامنها
أسئـل اللي خايض احروب عديــده

كمّين عين ملغوبة هنا خلّنـها
قليلات خير .. الخاتمة لاكيده

منقوض يا خياط ويبيعنها
ماعاد لي فيهن اقرام عقـيده

[ندعوك للتسجيل في المنتدى أو التعريف بنفسك لمعاينة هذه الصورة]

رزق
بصراحه قمه الابداع
فى اختارك
وقمه الابداع للشاعر
تسلم وصح السان الشاعر

منور يا رزق على القصيدة الجميلة

وعلى الاختيار الاجمل

ربي يحفظك وصح لسان الشاعر

رزق جميل فعلا جميل ما نقلت صح لسان الشاعر ودمت لنا حاملا معك كل جديد

صقع ياغالي وربي يحفظك
ننتظر جديدك

ماشاء الله ابداع

اختيار مميز اخي رزق

تحيتي واحترامي

دائماً تبدع في اختيارتك

كل الود

وننتظر جديدك

رزق

صح لك

وصح لاخى الكريم وجارى ولدى منطقتى مهدى بشير التمامى

[ندعوك للتسجيل في المنتدى أو التعريف بنفسك لمعاينة هذه الصورة]

» تاهل بنغازى الجديده الى نصف نهائى كاس الفاتح
» تخنجر علية اليل.((لمهدي بشير التمامي))
» شريط كامل للشاعر أمهدي بشير التمامي
» برنامج القرأن الكريم في صورته الجديده والمطوره >>taxi
» اشعفت ماالغلا لين كويت .. على ايدىللشاعر المهدي بشير التمامي