رد الشاعر عبدالرحمن بومغيب على بوروين

قصيدة الشاعر بوروين:بطون النساء


تجيبن كبير الشان يابطون النســـــا .. وتجيبن كبير النفس والحمال
وتجيبن شداد الباس وابطال الوغـــــى.. ويحاموا اللي خايف بكل افعال
وتجيبن يدين الجود في المد والعطــا.. ويروفن على القاصر ضعيف الحال
وتجيبن يدين ابخال تشبه الوطـــــا.. اللي مجدبة واجد جدبها طال
وتجيبن تريس سماح شيمتها الوفــــا.. وفي الضيق تلقاهم انضاق الحال
وتجيبن تريس امغير في نهارات الــرخى.. وفي الكرب مامنهم يبان خيال
وتجيبن اللي يخشوه جبارة العــداء .. وتجيبن ضعيف القلب والدلال
وتجيبن اللي راية يدلك على الهــدا .. وتجيبن اللي راية تقول كحال
وتجيبن اللي قال في القول اغثـرى .. ولا الناس تاخدله كلام ان قال
وتجيبن لذيذ اللفظ للناس لا حكــا.. كلامه نقي كله زها للبال
وتجيبن اللي في الوجه صاحب ماسمحى .. ويهونك بعد وقنك مال
وتجيبن اللي فعله مخالف مظهـره .. اللقيه ملاك وهو ردي الافعال
وتجيبن اللي على القوم فاهق الخـلا .. يدير خفيف العظم ماو تنبال
وتجيبن اللي لو مات ماعاد ينفـدى .. وتجيبن اللي موته صحيح حلال
وتجيبن اللي لبان يلف ك كـذا .. ولا غيبته تطلق عليك خلال
وتجيبن صقورا فوق ركازه عـلا .. حتى عشوشهن في اعلى علا لجبال
وتجيبن اللي عاقل وينهى على الخطـا .. وتجيبن اللي من الصادقه زعال
وتجيبن اللي جوفه معبا بالهـوا .. شهيق وزفير مع خليط هبال
وتجيبن اللي جياب الافخار والثنـى .. وحمول فوقها من حمله لهن شيال
وتجيبن اجواد صحيح ماهم للغبـا .. شبيه بضنا شيحا اولاد هلال
وحتى في المنام ان جوك يلفالك زهـا .. لجواد عز مبعد لجواد رجال
اجعنهم ضنا لجواد ديما في هنـــا .. يامن ترسي في الوطا بجبال
ان غابوا يغيب الخير ويعيب البها .. الدنيا بلاهم طعمها يبسال
لجواد دون الجار في يوم البـلا.. يشقوا لهيب النار بالارجال
ولجواد عز الضيف وقت مالفـا .. حتى وهم فقار جوهم هيال
جوهم تلقى الطيبه والحيـاة .. خير من طعام لذيذ بين افحام
والجود كنز من عند الجلالة ينهدى .. علينا سماهم واجدين قلال
ويبان كيف الشمس في وان الضحى .. اللي نورها مايحجبه غربال
ولجواد بالاموال بالارواح بالضنا .. الجود فعل لا كثرت ذهب لا مال
ولجواد كيف الغيث خلاط الثرى .. يحايي عروقا عودها مذبال
ولولا ضنا لجواد شيالة العنـا .. ما بالمحاسن تنضرب لمثال
يالله ياضامن عشانا والغـداء .. لنا وخالق في الوطن اوكال
وخالق اوجوه سماح مليانه سخا .. وخالق وجوها شاحبه وانتال
اجعنهم ضنا لجواد شجره مثمره .. اللي بوجودهم مايخيبوا الامال






رد الشاعر: عبدالرحمن بومغيب

اول كلامي نفتحوا ابصلا ..ونحمد الله الواحد القهار
جربنا الناس بغربله ونقّا ..كيلنا الراسي والخفيف اعبار
ولقينا فوارق واسعات مدا ..ابطون النسا جابن اطوار اطوار
بطون النسا جابن تريس اقسا ..كيف عمر والعباس والمختار
بطون النسا كان الكريم عطا ..يجيبن اللي يديّر ايرد الثار
وتجيّبن اللي وقتن ايسير بلا ..يخلي سبيب الغايرات دمار
وتجيبن سقيم الراي كان حكا.. وتجيبن غشيم اللفظ والمكار
وتجيبن ولد الاصول وجهه ندا ..وتجيبن قليل الخير والغدار
وتجيبن صقورا مقدمه وبها ..على كل ريح اديره يندار
وتجيبن ازعيبيره وضيق وعا ..وتجيبن ثقيل الروز والصّبار
وتجيبن اسبوعه كاسرات اقوا ..وتجيبن ثعالب جبن واستهتار
وتجيبن اللي مارق وذيب خلا ..وتجيبن اخرين تنابله بيار
وتجيبن سلايل طهر واستحيا ..وتجيبن سلاليل ما وجوه عمار
وتجيبن سلاليل نايرات اضيا ..وتجيبن سلايل هم اوجوه العار
وتجيبن اللي ف الصبح كان لفا ..ماعد اتراعي شر فيك نهار
وتجيبن اللي بالعكس وجه شقا ..اشكل وبراريمه اتلف ايسار
كي ترافقه ماعد اتشوف هنا ..تختم جميع دبايره بمرار
وجهه امصدّي م الذنوب صدا ..ونيته وفعله شبهة الكفار
عايش حيا ضنكا حياة كدا ..ومكره يرد عليه دار بدار
حقيقة الواجب الاعتراف بها ..تجارب طبيعي موش بستطيار
وتجيبن قعيده ماعليه اعبا ..وتجيبن رفيع النفس والنغار
وتجيبن سخي ليدين كان عطا.. وتجيبن رقيق العزم والحزار
وتجيبن اللي يساتر انحق اخيا ..وتجيبن اللي فتان بستمرار
وتجيبن اللي ما للجوامع جا ..الا وهو جنازه لاحقه الحفار
وتجيبن اللي عارف ودار وقا ..وعابد الله بذكر واستغفار
وتجيبن العشي لامشا لارا ..وتجيبن اللي مايمسكه موكار
وتجيبن المتصرف انجاه صغا ..وتجيبن اللي في كل شي يحتار
وتجيبن اللي يجلى ان جاه جفا ..كيف بو اسبق وقتن اضايق طار
وتجيبن اللي مايقول كلمة لا ..وتجيبن اللي دشاع والحجار
وتجيبن رقيق الوجه فيه ندا ..وتجيبن اوحود اوجوهم حصار
وتجيبن جوايد يبذلوا بسخا ..وتجيبن اللي مايكمل المشوار
وتجيبن اللي خايب عطيب اريا ..وياما اتجيبن من اعقول اكبار
وتجيبن اللي صافي نظيف البا ..وتجيبن جماعه خبث واستكبار
وتجيبن اللي ياجب عليه ابكا ..وتجيبن اللي مايقيم نصب الطار
والحكم حكمك لااعتراض ولا ..وحنا حكمنا عللي ايبان اجهار
طلبت اطلبي من رب السما ..بيوت الجود يجعلهن عمار
وبيوت البخل تجعلهن خلا ..ووجوه الخير تجعلهم اخيار
وصلاة النبي واجب علي ابها ..نختم جميع القول والاشعار
اعداد مانبت وقتن ايطول ثرا ..واعداد مانما عوده ودار اثمار
واعداد ماعلي وجه الوطا دبا ..واعداد التراب ورملها وامطار