بنــــــات الجنوب

احد شعراء مدينة سبها يقول:

ماسون مريومة ...... خفة ورزانة وبنت ناس اقرومة
بناويت سبها
مايسونها .... ولها وصايف ماهن اللي طالنها
عقول واجدة خفت بعد راعنها .... وتمت وراها اتموج في ديمومة
وان جابن الجيابات ما جبنها .... اختا الها ف الزين ليها تومة
ماسون مريومة .... خفة ورزانة وبنت ناس اقرومة
بناويت سبها
ماهناك مثلها ... صورة فريدة ربنا جاعلها
بيضة وزايدها جمال خجلها ... خايل عليها وقصته مبرومة
اتحقه اركيّب وين زام اولها .... ناوي وطن فاحن عليه غيومة
وايهدرلها تسمع رطين فحلها ... ايبرطع ايميزر مايواطي خشومة
ولها عين من حايم بقو فتلها ... جنحانه الدامي اللي سريع اهجومة
غريم للحبارة وينما قابلها ... ايجيها ومايخلي بها لملومة
وحاجب وشفة وخد زاد عدلها ... بمضحك ايجلي عالحزين غمومة
تصعب على من قال نا نوصلها ... حتى انكان عنده واسطة وحكومة
يقصر عليها ايطول غير عللها ... ويبقى ايعاني من لذيع سمومة
وينزل امواكر قبل مو نازلها ... وعلى ايديها تبقى انهايته محتومة
ماسون مريومة .... عقل ورزانة وبنت ناس اقرومة




فاحببت ن اشارك الشاعر بقصيدة لبنات الشاطي كلهن

فقلت:

افكار عقلي ترتفع وتواطي .......دايب وحاير في بنات الشاطي

حاير فيهن....بناويت هلهن راضين عليهن....وعيني ماتمل الشبح فيهن ..جميلات من ربي الكريم العاطي

رباية عز وربنا عاطيهن....وهلهن فراسين وروسهم ماتواطي

علي قد مابنقول ميساويهن ....كلامي علي مولا الغتيت قطاطي

هلي بصيفة ربنا هاديهن..... حشمة وجمال وعز وانبساطي

ليا جن في لصدار ونلاقيهن...انوتي فروحي ناخد احتياطي

خايف اعيون اكبار يرزن بيهن .... ورموش كي لحراب صف امشاطي

حواجب ارقاق اسماح بانت فيهن.....رسامهن لغريهن ماهو عاطي

وشفايف بلون الورد متكسيهن.....صافيات في البشرة بدون نقاطي

سوالف اطوال تميح يسفن فيهن.....غالبات فيهن وكايدا المشاطي

ومشيت زعيم اخطاه متخطيهن...... تاقلاه في المشيه وفيه نشاطي

افكارعقلي جبدن طاريهن...... تمنيت وحده تكون في ارتباطي

ومانملش في الكلام عليهن...جلاايب الشاطي...اغزلا وحيشات في فج الغواطي

افكار عقلي ترتفع وتواطي .......دايب وحاير في بنات الشاطي


من اشعاري:اسامة المقرحي