حكاية عدنان ولينا باليبى

السلام عليكم
هذى قصة عدنان ولينا بالليبي والله اضحكت وين قريتها فقلت خلنا ننقلها للأحباب هني ونغيرو جوهم.

هذه الحلقة من عدنان ولينا بالليبي

***************************
البداية عدنان ولينا امكسدين

عدنان : كنك يالينا معصبه؟

لينا : مش عارفة حاسة انه حننخطف زي كل مرة .

عدنان : يحلموا سميرة وعلام وكل جنود القلعه

لينا : مانيش مرتاحه احس اني منغمه وشكلهم بيخطفوني

عدنان: اللي يقرب منك يا ويله نعفس علي خشمه قدامك ..

لينا : يابعد قلبي ياعدنان... نجيه يا ربي

عدنان: كح كح تسلميلي.. المهم وين عبسي؟؟

لينا : مش عارفه اكيد يصيد في ضفادع علشان يتغدى ...

عدنان : وع الله يقرفه يلقنه مرطاز... المشكله انه خوي ولازم انتحمل بلاويه

لينا : يمي يمي .. حس طيارة سميرة يمي !!

عدنان : ما تخافيش وقفي وراااي واللي داير روحه راجل يقرب منك

**سميره مع الجنود نزلو من الطياره**

**سميره تتكلم بالمايك من بعيد**

سميره : سلم نفسك ياعدنان ولانخربولك وجهك .

عدنان : اسمعي يا الشينة روحي من وين ما جيتي خيرلك

سميره : حول من قدام لينا... وخلينا ناخذوا لينا بالطيب خير لك

عدنان : وين تاخذوها بالطيب؟ ما فيش رجالة ولا شنو.. تي اللي يرش لينا بالميه انرشه بالنار.. تي نحرقه حرق .. انشفشفه

سميره : اسمع ما ديرش روحك راجل قدامها راهو انطلعوك عيل !

عدنان : لينا ماتبيكم ولا تبي عيشتكم.. لينا خطيبتي وانا متكفل بكل مصاريفها

سميره : الله واكبر على المصاريف؟ هو كله قفطان واحد من بداية الحلقة ما عندهاش غيره ..لقيها ارخيصه ..

عدنان <<<< طاح وجهه هع هع

لينا : شن تبو مني خطوني .. خطوني ..

سميره : اسمعي انطمري انت الاخرى خيرلك...حركاتك هذي عارفينها ..

عدنان : ماعاش اللي يقول لـلينا اطمري... شكلكم تبوني انربيكم مزبوط ...

طاخ .. طاف .. طج .. طن

**طحنت طحنة قوية بين عدنان والجنود**

**في البداية لعب فيهم عدنان وبعد شوي طاح علي وجهه واغمى عليه**

**الجنود خطفو لينا في الطياره وعدوا شور القلعة **

عبسي : عدنان كنك راقد ؟ كنك؟؟

عدنان : اي.. اح.. ضلوعي متكسرة والركب تتصافق .. آه .. آه .

عبسي : كنك ؟ شن صارلك؟

عدنان : وينك... سميرة والجنود كانو هنا ومرغدوني في التراب وخذوا لينا وعدو بيها للقلعة .

عبسي: معقولة يا راجل ؟ كانك ما ناديتني يا راجل انصبي امعاك ؟

عدنان : وانا وش عرفني انت وين قاعد توا ؟ طول عمرك اتزر ورا الضفادع والسحليات قرفتنا في عيشتنا .

عبسي : باهي شنو انديروا توا ؟

عدنان : نبيك تراقب الميناء كانك شفت سفينة القبطان نامق قولي تو نكرسوا فيها ..

عبسي : حاضر انت تؤمر يا عدنان ..

عدنان : عارفك امنور يا متاع الضفادع ..

عبسي : اوو عدنان فكنا من الجو الشين ...

عدنان : لا جو شين لا هني يا راجل هظا الصاح يلقنك امتاع ضفادع .. ها ها ها ها ها

عبسي : باهي خير منك يا متاع لينا ... ها ها ها

عدنان : باهي باهي ما تكثرش الدوة امعاي خيرلك ... عدي راقب يا الاجرب .....

**بعد ساعتين مرت السفينه**

عبسي : عدناااان وصلت السفينه هيااا تعال بسرعة

عدنان : اسمع خلينا نلبدو في المخزن امتاع السفينة وكان وصلنا للقلعه ننطلق ورى لينا

**وصلت السفينة الى القلعة**

عدنان : اسمع يا امتاع الضفادع انا بنعدي اندور لينا.. وانت شنو تبي اتدير ؟
عبسي : انا يلقني نبي ناخذ غفوه لين ما تجي انت ولينا .. عارفك مش محتاجلي عارفك صقع ...

عدنان : آه منك وخلاص ما يصيرش منك الا صياد ضفادع .. المهم راك اتشخر بعدين اتشهدر بينا
عبسي : ما تخافش كون هاني ...

عدنان : .. هوايك رقد يالاك ابطل .. بطال ياعين سيبك

لينا : امكسدة في الدار ... ونا عليه كبدي ذايبة .. عزيز عالنظر مابان

**عدنان وصل لغرفة لينا ويكلمها من ورى الروشن**

عدنان : حياتي عيوني وحشتيني ....باتك قاعد ..قصدي ..ضربوك ولا جو شورك ..

لينا : هلا هلا عدنان .. نورت والله .. مش متوقعتك اتجي بكل ....وصكتها غناوة ( بعد غيبه عزيز جااا ...يا عين اطربي..

عدنان) : بالجودة بالجودة بيك والله .... كلنا مشتاقين والله ..(عقلي فيه ثلاث وصايــف **** مجـروح وغـاوي ومـرايف...

لينا : مشتاقتلك موت والله ...امبدري حسيت بيك .. انك تبي اتجي ... ( العقل مرايف فاقد ناس .. عليهم طابق باب الياس

عدنان: ما شميتيش بنة عبسي .. ها ها ها ها ها ها ها ....

لينا) : يووووه يلقني شميتها بس لخبطت بينها وبين مجاري السفينة .. المهم تو طلعني ...

عدنان : ولايهمك لحظة انوريهم ايهدوا علي نصرا ....

لينا) : غير تعال هنا يا راجل ..لا نصرا لا شي كنت قاعدة تكذب علي . هو واحد عطاك بالبند قه علي راسك دخت دغري .. علي سبلة ..

عدنان : لا مش هكي ... واكل حوت بس ....

لينا : واكل حوت اه .. باهي باهي ما تكثرش دوه وطلعني بسرعة !!

عدنان : باهي بعدي من حذا الروشن ... خليني انكسره .!!!

** عدنان كسر القزاز وطلع لينا **

عدنان:عبسي هي بسرعة ....

عبسي : اهلين بلينا نورتي والله ..

عدنان: عبسي افطن لروحك ...فكنا من الجو الشين

عبسي : اش بالله الجو الشين اتدير فيه انت .. جو النقارة هظا فكنا منه ..

********
لينا : ياشباب سميره ورانا .. بسرعه قبل ما تلحق علينا

عبسي : المشكلة ان القبطان نامق راقد ...

عدنان : بسرعة عدي وعيه يا عبسي ما عاش فيه وقت التلفون معاك دير له رنة

**تلفون نامق ايرن**

نامق : الووو.. من اللي معاي ؟

عبسي : نامق الله يرحم بيك نبوك اتصبي معانا ...

نامق : ما عندكش مشكلة ايش تبي مني يا امتاع الضفادع هاهاهاهاهاهاهاها ؟

عبسي : يووووووووووه عليك شهدار عدنان هظ ما فيه واحد الا وقايلها له اكيد قايلها حتى لسميرة ..ا

نامق : اوه قلبت علينا المواجع ...

عبسي : باهي اوكي يا متيم انت ... هيا بسرعة خلينا نهربوا منها ...

نامق : اوكي تعال للسفينة وماعليك تو نصرف ...

**ركبو السفينة ونامق نزل عشان يتكلم مع سميره**

نامق بعد شاف سميرة ...

نامق :غني طالق فينا نـيران **** تقول يحارب في عدوان

سميره) : وينهم؟ يا نامق ؟ وين عدنان ولينا ؟

نامق : مسكونه الغلاء مالها دواء ... اتبات كل يوم ابراي ..

سميره : سكر فمك .. ورد عالسؤال ..

نامق : ياصهيد نار عزيز .. في أيام ومد متلا قي علي ...

نامق : سميرة مستعد نعطيك لينا لكن نبيك تعطيني قلبك ...

سميره : هاهاهاها ضحكتني... قلبي ايش تبي في قلبي ... (ثريتك اتسوقط ياغلاء .. اوقضت بيك هنا دون ..

نامق : صقع علينا يا ..سميرة نبي قلبك نبيك اتكوني حبيبتي ونعطيك رقمي وتتصلي بي وانهدزا باهي ..

سميره : ياولد تحشم على وجهك <<<< وبعدين عبي تلفونك رصيد فل ..

سميره : في سرها بس .... ( مداعيات عالوهام .. دليلي وعيني وخاطري

نامق : مستعد نملا رصيد بس خليني نسكن قلبك لو ليله وحده .....

سميره في سرها . وهي متحشمه من نامق .. ( أسنين واجده ناسيه الغلا ...أوقضت غير هانا دون
نامق : كنك سكتي

سميره : لا كنت انفكر في التلفون جهازي ما ينفعش ونبي جهاز الدمعة حال الغاية ..تجبيلي واحد
نامق : ما عندكش مشكلة نشريلك الدمعة والعيون اللي دمعاته ..

سميره : لها الدرجة اتحبني ..

**عدنان زرق راسه من من السفينه**

عدنان : هي يا نامق سكدنا عطيها الرقم وهي ..

سميره : تمشي في عينك.. انا نبي نمشي معاك .. والله ماعاد نتركك رجلي علي رجلك ..

عبسي : يا نامق مرات تبيعك امغير تبي تركب السفينة واتورينا

سميره :ردت عليه سميرة .. ( العين ع الضلال أتوب .. إن طالت اللي في بالها ..

نامق : تفضلي ياقلبي اركبي برجلك اليمين ( أصحيت للغلاء تالي .. واجعاتني أيامي الهالبه

لينا : يمي يمي.. سميره تبي تمشي معانا يا عدنان ..تو تضربني ..

عدنان : ما تخافيش نامق لسنها ... والله وكبدت عليه .. ماعاش اتجي شورك .. دواها عندنا تو ...

عبسي : امنور نامق والله بالجودة بيه هكي انتريحو من سميرة ..

عدنان : يلقني انا اللي تريحت مزبوط من سميرة وطيارتها

[ندعوك للتسجيل في المنتدى أو التعريف بنفسك لمعاينة هذه الصورة] روعة سلمت الانامل

بناتى حياتى

الله يسلمك اختى الكريمة

ان شاء الله عجبتك

[ندعوك للتسجيل في المنتدى أو التعريف بنفسك لمعاينة هذه الصورة]

شكرا لك علي نقله الرائعه
والمتميزه والجميله
[ندعوك للتسجيل في المنتدى أو التعريف بنفسك لمعاينة هذه الصورة]

سجينة الاحزان
الشكر لله اختى الفاضله
الجميل والمتميز هو مرورك العطر الى صفحتى اختى الكريمة

[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذه الصورة]

بنت الاجواد

الله يسلمك اختى الكريمة

[ندعوك للتسجيل في المنتدى أو التعريف بنفسك لمعاينة هذه الصورة]

» حوار بين عدنان ولينا بغناوات .. وشتاوي
» باليبى زى مايقولوا
» حكاية الحمار والثور
» حكاية زوج مديرة
» حكاية غرامى