زائر

الشاعر ناصر الشيخى ايسلم على لجواد وين ما كانوا ويقول : -

انسلم على لجواد *-*اصحاب المروه نورت الميعاد * ونقول مرحبه
بلا تحكير*-*-*انسلم انمسى عالجواد ابخير
مالحدود من شرقه لراس اجدير*-*من عند الشواطى لا حدود اتشاد
سلام عد ما رفن اجنحت الطير*-*وعلى عد ما صب السحاب وجاد
سلام من صميم القلب مو تزوير*-*سلامى عللى سطروا لمجاد
فرسان ليبيا ركابة القنتير*-*اسماح الفزع وينما ايسير اعناد
وتفنى الدنيا والكبير كبير*-*ولا يسير بيت بلا عمد ووتاد
سلامى عليكم يا سماح السيره *-*ياطيبين الخيم يالجواد
ياهل العقول الثامره الكبيره*-*ياقرعتى يانورة الميعاد
وقرعت اللى قاصر اخطاه قصيره*-*ويللى فالشدايد هل اعزوم اشداد
سوا فى رفق والله سوا فى جيره*-*ما كيفكم لا اسع القيت اضداد
انتو عمار الوطن كيف الديره*-*اللى فالبدارى برقها وقاد
اتخلى بطاحى لرض كى الحصيره*-*انواع عشبها تصعب على العداد
ونتو ابيوتكم للقاصدين شهيره*-*بلا دليل ياتوهن ولا نشاد
ركابة الحصان اللى احثيه وديره*-*ايحيد انشال ايديه فالملهاد
مساره قجوج وسمح وين اتسيره*-*كما ذيب متواجل اسعاى ابعاد
جلده رقيق ووبرته اتقول حريره*-*لونه حمر ويميل للنرباد
قصير الظهر وقيون فيه قصيره*-*رفيع شوف مرقب مو اللى حلباد
جرجاره اكوام ووبرته الغزيره*-*غثيث بنت نقض غالب الكداد
نادر اعيون اتقول ريم عقيره*-*اللى فى عشيه ضايقه صياد
امجنس اصيل من مناسل خيره*-*امخاطر عليه وجاى بالميزاد
استوبار عالواشون واجد خيره*-*من يوم اربطوه وخيرهم بداد
الابل وضان امروسومه ومطيره*-*كل عام صابه تغلب الحصاد
وعلى نخرته ديمه ايبات شعيره*-*مكلوف نين ما شده ولا شداد
انشده ابسرج ايعجبك تنويره*-*يبقى يلتحاط اتقول فيه ابراد
وفوق من عذاره كى اتثوب ذخيره*-*مشواره ايجلى مالقلوب كساد
والجود فعل مى كثرة افلوس وليره*-*غريزه عطاه خالق العباد
الدنيا الناس اقلال موش كثيره*-*وداره وراثه من اجداد اجداد
اللى عندهم دون الكرامه غيره*-*ابدينهم وبيهم عازة لبلاد
عليهم العقل ايجود فى تقزيره*-*الخيّرين يطريهم بلا جباد
والجرح الكبير اللى قوى تسطيره*-*مع ذكرهم يبره بلا ضماد
وعلى جارهم ما يعرفو تكديره*-*ولا يسكرو فالبير عالوراد
ونجاهم القاصد يعرفوا تقديره*-*ولجواد ديمه للعرب مقصاد
فكاتت القضيه الواعره العسيره*-*اللى غيرهم مالناس فيها كاد
ولا يفتنو لا يعرفوا تعكيره*-*نظيف دربهم مالغبن والاحقاد
ما هم وذايل هل انفوس شريره*-*خراب عامره فالوطن كى الجراد
ولجواد همللى يستاهلو الشكيره*-*وشور غيرهم لجواد ما ننقاد
وندعى اللهم فى كل وان ظهيره*-*وين ما الشمس اتميل للمهواد
يالله ياعلم لاغاوى طيره*-*ياكريم ياحنان ياجواد
ان تحفظ ضنا لجواد مالتكديره*-*اللى عالفقاره يقسمو فالزاد
ونختم كلامى بالصلاه عالخيره*-*إعداد ما خلق فوق الوطاه ارشاد
انسلم على لجواد *-*اصحاب المروه نورت الميعاد ونقول مرحبه
المصدر : من الشاعر نفسه :king: :queen:

زائر

تبي الحق مفهمت شي

عليه الصلاة والسلام

منورة منورة واجد على القصيدة ولا اروع
من شاعر كبير متل ناصر الف سلام ليك
ولشاعر الكبير

ني اسجل اعجابي بالقصيدة

عشتي

مشكور علي الاختيار الرائع والكلمات الطيبة

تحياتي...........السامر

لك كل الشكر والتقدير على هذا الانتقاء الرائع

انها قصيدة تستحق ان نقول انها معلقه

وصف متكامل لصفات الاجواد ..

والاجمل هو الوصف الدقيق والمتكامل للخيل ..

ملاحظة :فكاتت القضيه الواعره العسيره

اعتقد انها فكاكت القضيه الواعره العسيره..

مشكوره على القصيده الجميله ولك مني كل
الاحترام والتقدير

» سلام علي ضنا لجواد
» جلسه مع لجواد
» يا صاحبي ريتك اليوم ...# من ابياتي الهامه
» عيد ميلاد بنت الاجواد يالبدووو
» لجواد اسْمهم دوم مشهور

{{ سلام على ضنا لجواد }}