ياقبر (رثاء)

يا قبر رثاء للشاعر عابد بو خماده


ياقبر بين اقبوره** باترابك تغطى فيك سمح الصوره ** احسن اضيافته

ياقبر قبله خالي ** جاك ضيف م الدنيا عزيز وغالي

اسوال النبي يا قبر عين الفالي ** لاترعبه ضيك اضوي باحضوره

مادار بيش اتظايقه هيالي ** ولا انحمل ضيمه غير تما بوره

غالي وخلالي اعزاز غوالي ** امحظن عليهم ريشتي مكسوره

ياقبر سلمنالك ** غالي عزيز وخود منه بالك

لاتظايقه خفف عليه اتقالك ** وابقاله ونس م الخوف وابقا نوره

اللي لا يجيك ولا دفا يبقالك ** لو كان البشر يفداه من مقدوره

لكن الروح اختص بيها مالك ** كمين طيرقبله هللبه لطيوره

ياقبر جالك عامر ** بزول العزيز ونا انكابي سامر

لوعت الصدمه في افوادي ضامر ** والبكيه علي القيتا امظوره

ملي غلاهم بيه مايتغامر ** فيهم انجنب للبكا واخطوره

خايف عليهم م الرميص الجامر ** الا نا دواه الكبر يا مقبوره

ياقبر في جبانا ** عللي اسكنك مايكمل سريب عزانا

ولا عد ايحودد فيك وقت ابكانا ** عزيز عزمنا مارق سل اجدوره

خلالنا ودايع قاطعات الوانا ** واوهام فين ماشينا اتبان ضروره

اسمالله علينا يا غياب زهانا ** دوبينا حيين فوق الكوره

يا قبر سود انظاره ** حتى لو تواره فيك مايتواره

لابس الخاطر في بنات افكاره ** هي لامه ولا وهي منشوره

شايلاتني ديما امعا تياره ** حتى ونا ياسه كتبت اسطوره

ماعاد في الدنيا ايصير اجواره ** ولاعاد نزهوبا عزيز انظوره

مابقيلنا منا الا ماداره ** عالحوسه انجوها للبكا مديوره

يا قبر لو اتمره ** منه ومن فعله وترعف بره

اساع تعتقه م الدود مايتفره ** ولا تاكله بتراك سافي دوره

اللي وراه خلالي افواهق مره ** واجروح مكن يا قايس الجرح اسموره

واوهام لوحنني هنا ولا بره ** في كل دار وكل وطن انزوره

وين ما انعدي تلتقاله جره ** عزيز مو امسييبلي بلاه اشبوره

ياقبر ماننساه ** حتى لو ترابك رادمه وكلاه

مازلت عايش في اوهام غلاه ** ومازال ساكني بصوت وصوره

مابا يفارقني بعد فرقاه ** ولا انسيتله برما عزيز ونوره

ولابا علي ايكف بامهاياه ** في كل حيطه صورته منظوره

ياقبر سود هدابه ** حتى بياساته وطول غيابه

علي ماتوارت بهجته وشبابه ** فيامن وهي متبسمه الغروره

وعاطيه بياض الوجه موش ازرابه ** اللي بيه غرتنا وهي مشهوره

اتزهي الحي وعندها نقلابه ** كمين وطن عامر عاليات اقصوره

خلاته و خللاته يثوب اترابه ** بعد عز واجد لوحت جمهوره

واللي قبل حاسبله احساب وهابه ** بعين الطمع تما ايبهت شوره


ياقبر بين اقبوره ** باترابك تغطى فيك سمح الصوره ** احسن اضيافته