العاصفه.....ابوريان

السلام عليكم ورحمة الله وبركاته
اليوم جايبلكم قصيدة قد تكون مثيره للجدل
لااقصد التعميم
نأمل ان تعبر عن واقع نعيشه فى مجتمعنا.

انقول:-

ما عاد فيه انوثه....ولا ريم هامل في خلا منعوته
بقت جاذبه

معاد في نسوان....ولا جيل توا كيف جيل زمان
ولا عاد خرخوطه عليك تبان...تلهب مشاعرجامده مكبوته
ولا عاد عصرانه وليها شأن...أيجيب وصفها شاعر فحل منحوته
ولا عاد الحنانة عندها حسبان...موضة ومظاهر خادعه ممقوتة
والصقر وله ديك يا حبان...والديب وآلف واقعه مثبوته
قعدنا انقولوا غير كان وكان...واقع مرير وراضين ثبوته
كيف منهو يسمع في ضجيج ألحان...أوتار النشاز مخالفات النوته
وكيف منو قدام القضاء مدان.....على فعل ماضي من زمان حدوته
وكيف منو عايش في الحياة تعبان...وقدام عينه ينتظر تابوته

ما عاد فيه انوثه....ولا ريم هامل في خلا منعوته
بقت جاذبه

ما عاد فيه حنانه....ولا عاد المشاعر بالغلا ولهانة
ولا عاد العواطف بالوفاء مليا نه...ولا عاد معنى لفعلها الزغروته
ولا عاد مرآه قانعة مطمانه....تمت أتخوف قنبلة موقوتة
ولاعاد راجل تعرفه بكيانه.....قدام النساء خانع واطى صوته
قليل منو يعرف كاره الامانه...وقليل منو على الصحبة يسيب قوته
ولا عاد الخطأ ينهو على ديرانه...ساوت وتمت رابخه مفلوته
ولا عاد من يحفظ شرف جيرانه....ولا من يقدر في مأسى خوته

ما عاد فيه انوثه.....ولا ريم هامل في خلا منعوته
بقت جاذبه

معاد فيه أقدار...ولا عاد أصغار يقدروا الكبار
راح الحشم وراح الاعتبار...وقدام بوها البنت تلبس توته
والشاب في الشوكه على انتظار...لا ماشيه لا جايه بتفوته
مقاطع في لبيانا وفى المدار........وهاتك أعراض الناس في بلاتوته
ويحكى على هيفاء وشنهو صار...والبوم أليسا مع الكتكوته
وعلى الدوري الايطالى يجيبلك الأخبار...وكيف سطربوا الخليج بالتيوتا
لا يفهموا شن قصد الاستعمار....ولا غزو تقافى وبتريوته
لا كمل قرايه لاخدم محتار..... تقافه شطيح الجهل حتى موته
وهذا شىء من الواقع وبأختصار...وهادى الصره وعندكم منكوته
وعفوا انكان اخطيت ياحضار...الكلام يعرفوه اجواد من منبوته
العادات والثرات فى احتضار....وهيا قبل ما تسقط أوراق التوتة

ما عاد فيه انوثه....ولا ريم هامل في خلا منعوته
بقت جاذبه

واسلمتوا

ابوريان

سلم ايديك خويا

علاش هذا كله خليك وسط ما تعممش

الانوثة موجودة ..والحنان .. والقدر

هكي ظلم

على العموم مشكور

بدوي للمليون كتب:: سلم ايديك خويا

اسلمت
اخى/ البدوى
اسعدنى حضورك لاتحرمنا من تواصلك
ابوريان

معاد في نسوان....ولا جيل توا كيف جيل زمان

صح لسانك ابو الشعراااااااااء

شكراً اخي ابو ريان ودمت

مبدع

واتمنى ان تكون كتبت هذة القصيدة

من باب الفكاهه

وليس عن قناعة

فمازالت الانوثة موجودة

وغير يسلمن بنات ليبيا

سويسا كتب:: علاش هذا كله خليك وسط ما تعممش

الانوثة موجودة ..والحنان .. والقدر

هكي ظلم

على العموم مشكور

سويسا
سعيد بحضورك
أنا لا اقصد التعميم فالاصاله والانوثه حتما موجوده وستبقى
ماقصدته هو الغزو التقافى الذى اجتاح مجتمعنا ليقلب المعايير فى النساء والرجال
تجد البنات يتشبهن بالرجال والشباب يتشبه بالبنات
هناك أشياء كثيره لاتصدق ان تصل الى مجتمعنا
الكثير قال هم قله؟؟؟
لا هم كثر هولاء بنات وشباب
اختى العزيزه عودى لقرأءة القصيده وناقشى بين السطور ستجدى اننى لا اقصد التعميم انا احاول محاربة ظاهرة مسئه للدين والاخلاق فى مجتمع مسلم مترابط
شكرا وربى يهدى لما فيه الخير
ابوريان

هايدي كتب:: معاد في نسوان....ولا جيل توا كيف جيل زمان

صح لسانك ابو الشعراااااااااء

شكرا
هايدى
مشاعر طيبه وحضور مميز
لاتحرمينا من تواصلك
ابوريان

تسلم ابو ريان اختيار موفق يعطيك الصحه