الشايب..والمرسيدس ....ملكيتي

حكاية الخاطرة........
أناتعودت علي المرسيدس هي سيارتي اكثرمن30 عام وفى ليله من ليالي رمضان
المباركة جاني ابني قال حصّلنا سيارة سمحة( زلمكه) جديدة حمرة اضربت في راسي حكاية الحمرة اضحكت؛ باهي أيش المطلوب؟ فى وقتها عندى( صفت) قديمه واكل عليها الزمان وشارب . ايش اتريدو؟
قالوا :- سيارتك و سيارة فلان أ حد أولادي هن الاثنين يأخذهن الراجل ونحنا ناخذو الحمرة. طلعت فى الشرفة كان القمر ماشاء الله زاهر ريت السيارة تلصف نحسابها جديده لاوينها عاكس عليها ضى القمر تلصف من حالها . قلت باهى... خذو سيارتي وسيارة الوليد عطوهن للراجل. وجابو الحمرة... المهم عدّت دوخة رمضان ..أيام العيد خذيّتا (( وين عاد زلمكه)) طلعت بيها.... شّديت الحزام مرخى أنريد نربطه تمّا يدلول ازعلت وسخنت! قلت انولع المكيف.. البطمه الى مسكتّا طارت فى يدى.. خارب طلع.. ايوه حصله........ لاوينهااموصّله حتاهى.! صرفت عليها واجد تعّبتنى او تعبّتها.....فجاءت هذه الخاطرة
تمّاالرفق بالهون وانتى حمره........... واللى مرافقك شايب امكمّل عمره
اتريدى واجد.....خذيتك سند للوقت بختي ساجد ....امغير تاكلي تميت ماسك جمرة
انتي تريدى عولة ....وتريدى رفيق صغير لايق زوله...مليان جيبه كي تديروا جولة
هو ينعكس في البار وانتي عمرة(صيانة).
ونا عالقدم دوّار كان طروله..نجيبك لظل وتقعدى منطمرة
من خوف ينظرك نقّار تبقي قولة ...ونا عالنزاع كبرت نخشي فامره
السيارة قالت:
ماتجيش مرافق...لانك سيولة ولاخيال موافق من يوم جيتي وانت عليا شافق
ولانك طرق لانك سماحة نمرة
قلت لها:
كثّر خيرك...يوم وخذتك عندى قرابج غيرك امغير العويل هووك..زقزق طيرك
خذيتك وليل وتلصفي عالقمرة
لاوينك ِكِشْفة امرخّا سيرك .....لاتسخني ولاتبردى في الكمرة
ولانك أجناب ولامثيل لغيرك .....امغير الاسم مرسيدس ولونك حمرة
ردت وقالت :
امغير تنابش ....حتي طروفي جبتهن مالرابش
امغير قول الحق...أيام قبل مابي البعيد تطق
أيام كنت امورّق...وكل خمس طاشر يوم بي أتشرق
وتزهي و ياباشا وفي تدرّق..وحتي عوج ركبيك ماينحق
واليوم هاملني وجيبك حرّق...وعمرك خلاص اتريد تفتا فامره

أرجو أن تنال اعجابكم وعذرا علي الاطالة