نحسابه عقل مازال في تياره / الشاعر يونس اشلبي

نحسابه عقل ما زال في تياره

خفيف وين ما ينظر بنات عذارى
ما زال هايم ديما
الخاطر وما يلتام فيه ظليمة
ان لبسن امريكي ساعة التخطيمة
يخلن اللي عاقل سفيه بطاره
والطايش اللي طايش خفيف القيمة
يزيد في الضلال وينقلب معياره
يطير الحيا م الناس والتحشيمة
وراهن يهيموا هيمة البندارة
بناويت نكذب ما قنيت عزيمة
معاهن ونا محسوب م الصبارة
غثيثن يصارع في هبوب نسيمة
سلوك من ذهب سالن بعد نصفارة
وخلك ان صار سلام والتكليمة
سوا مخالطة تبقى سوا بالشارة
كل كلمتين وبينهن تبسيمة
تجلي علي القلب العليل جظاره
وعندي سوابق في الغرام قديمة
ولكن اللي درته زمان خسارة
زمان كنت داير يا قرين حويمة
حدود المنى نحسباها خبارة
دورة العدو هابا عليك جريمة
كي تعبتي كي تعبت النقارة
ما زال ناصب سوقه
يريد البنات الشقر خفن بوقة
مريوح خطري ما بى يحودد شوقة
معاهن نْسي لصحاب في موكاره
عيون خضر خالطهن شْوي زروقة
مع هذب واقف شاتله بذاره
وسالف علي لجناب داير سوقة
كساهن وطال الجالسين جواره
وناصح كوافيره بدع في زوقة
بلمسة اسطى فنان م البيطارة
عطيب السعود الضايقات خْلوقه
يروّق ليا هبن عليه عطاره
ما زال مني رايح
نصحته وما فادن معاه نصايح
ورا بوغثيث طوال عطره فايح
ما بى يرد العقل في مشواره
بطول النهار وهو وراهن ذايح
بنات عاشن في بلاد حضارة
مناخها جميل وهي دلال السايح
توارى جميع تْرابها بخضارة
وتحلف يرشوا كل يوم روايح
في الشارع ليا فاحن عليك ازهاره
وهو طلق شر مع سنين شحايح
وطوّل وما حصّل غلا باقداره
خطرها غلا مول الجبين اللايح
يشاكع مثيل البدر في مظهاره
غلا صحيح مو كيفه غلاي النايح
اللي زمان داروا لي عليه حْجارة
ما زال سايل سيله
يريد بنت سمحة خايلة وطويلة
رامي عليها م الجذار عقيلة
وهي تفك راميها بكل جدارة
عيونها سماح وعندهن تعسيلة
وتصير من نظافتا لهن نخضارة
غزير هذبها وين ما معاك تشيله
ذوبة جليد تذوب دون حرارة
كلامها لذيذ تحس كي تصغي له
قطير م العسل نازل مع عصارة
الجالس يمر الوقت متهايي له
دقايق وهو فايت عليه نهاره
خفيف لبسها خالت بدون نبيلة
ودون عقد طاوس خلط والماجارة
ما تسد قولة يا قرين جميلة
ان كان للنسا وصف الجمال كبارة
ما زال كيف سعتا
الخاطر خليع يطيش في جرتا
ان شاف بنت سمحة خايلة لبستا
لجينز امريكي م الرفيع اسعاره
لبوسة شباب وله مزايا شتى
خذا شهرته في الوطن كي دولاره
عليه رابطة لكمام فانيلتا
وين ما حمى جو البلاد نهاره
تريد ديسكو رابخ وهو غايتا
تهيم وين ما تسمع عوا غيتاره
والناس كلهم جظوا مع برمتا
كيف رقصة الثعبان للسحارة
نظيف خصرها تخلاق في لويتا
عليها تروف تخاف م النكسارة
ان ماحت تلامس في الوطا شوشتا
عود خيزران امويتا تجارى

» اخر قصائد الشاعر الكبي يونس اشلبي وهو علي فراش المرض
» الشاعر يونس الشلبي(جفاك شين)
» الشاعر يونس الشلبي(لقيت صورتك)
» مازال شوقه فيكم ..
» فى حوار رائع استطاع الشاعر رابح ابن الشاعر الكبير جمعه بو خبينه ان يحرك مشاعر والده