تستاهلى ديوان موش قصيدة للشاعر مسعود صوة

ستاهلي ديوان موش قصيدة
وتستاهلي قلادة ذهب وحديدة
تستاهلي التمجيد
وتستاهلي الاشعار والناشيد
وتستاهلي لبس الذهب في ليد
وتستاهلي اللبسة اتكون جديدة
ودونك سرايا مجحفلة وحديد
ودونك صقورة في الحياة زهيدة
ولو يكملوا صنديد في صنديد
ما يوصلك سافل بمدة ايدة
وقداش دونك ماندفن شهيد
هانو عليك الروح يا فريده


تستاهلي ديوان موش قصيدة
وتستاهلي قلادة ذهب وحديدة

تستتاهلي با لاص
وتستاهلي لبس الذهب والماس
فطورك عسل والفاكهه ناناص
وكل ما تريدي ايجيك في الترديدة
اديري اخدم وايتبعوا حراس
ولا يوم حرة تنكسر لعبيدة
وتستاهلي احترام فوق الناس
عل عزتك عل عفتك يا غيدة




تستاهلي ديوان موش قصيدة
وتستاهلي قلادة ذهب وحديدة

تستاهلي الاشعار
وكسوة وحرير وملف مالبازار
وما دام في بلادي رجال حرار
تعيشي في عزة وفي حياة رغيدة
وراس راسك يا عمار الدار
لو نكملوا ما تنهزبش اوحيدة




تستاهلي ديوان موش قصيدة
وتستاهلي قلادة ذهب وحديدة

تستاهلي المحافل
وتستاهلي دونك تكون جحافل
ودونك نموتوا في الحروب قوافل
لاجل تعيشي في الحياه سعيدة
وموحال يدنى يوم منك سافل
ولا من يطولك يا شرفنا بيده
انتي صيفتك صيفة الريم الجافل
ديما على لنظار دوم بعيدة
قداش دونك طاح فارس حافل
بالنصر والتكبير والتشهيدة
وقداش غازي راح ريحت غافل
خسر في معارك ياسرة وعديدة

تستاهلي ديوان موش قصيدة
وتستاهلي قلادة ذهب وحديدة

تستاهلي فزعتنا
وتستاهلي ميعادنا ولمتنا
ولو كان في سباك جملة متنا
ماهو خسارة فيك يا المجيدة
يا سر فزعتنا عما قوتنا
يا سمحة الصيفات والتهميدة
نفدوك ياحرة وما همتنا
سيلت دمانا عالتراب بديدة


تستاهلي ديوان موش قصيدة
وتستاهلي قلادة ذهب وحديدة
تستاهلي حنية
يلي على شانك الموت شوية
يطيحوا تريس افداك ياليبية
يا شامخة فوق الجبال فريده
وديما عزيزة نفس دوم قوية
وديما عماها حق دوم عنيدة
وماعاد غير الروح فيه هدية
تستاهليها يا حزام الجيدة

تستاهلي ديوان موش قصيدة
وتستاهلي قلادة ذهب وحديدة
نفدوك يا العفيفة
يللي خديتي من جبلنا صيفة
كيف النسوم البارده في صيفه
وكيف الدفى ع النار يوم جميده
يللي عليك القلب رفرف طيفه
بالود يا حرة تكوني ريده
يا سعد من كنتي غلاه وكيفه
وكنتي عشيرة عمر يا الوديدة


تستاهلي ديوان موش قصيدة
وتستاهلي قلادة ذهب وحديدة

يللي خديتي من جبلنا صيفة
كيف النسوم البارده في صيفه
وكيف الدفى ع النار يوم جميده
يللي عليك القلب رفرف طيفه
بالود يا حرة تكوني ريده
يا سعد من كنتي غلاه وكيفه
وكنتي عشيرة عمر يا الوديدة
الله الله ...تسلم أخي الفاضل نجمى على نقلك وطرحك لهذه القصيدة الجميلة..
لك مودتي وتقديري...

تستاهل باقات من الود والتقدير ,,
نجمي اضاءت منتدانا باطلالتك المتميزة دوق رائع واحساس مرهف,,
صح لسان الشاعر ,,
ودمت متالقا ,,
لا تحرمنا جديدك

عقاب وانت ايضا تستاهل كل الشكر
اتمنى الا تحرمنا من كلماتك المشجعة

احمد الفرجانى شكرا انت الرائع والروعة منك نستلهم
دمت لنا صديقا عزيزا

رواء انتى تستحقين بساتين من الورود والازهار
لحرمنا من طلتك وكلاماتك الاكتر من رائعة
حفظكى الله

بارك لله فيك
شكرعلي المجهود الطيب المبدع
مني لك فائق تحياتي

الله الله تستاهل عليها كل الشكر

مشكوره