خيرية و تركية ... قالك كول رزق الدولة ,, رزق الدولة مش حرام ...

[ندعوك للتسجيل في المنتدى أو التعريف بنفسك لمعاينة هذه الصورة]


خيرية : اهلين اهلين تركية .. تي وينك يعطيك كية معادش تباني يا مراة .

تركية : يعطيك كية تفصلك انتى ان شاء الله .. قاعدة في الحوش يا وخيتي لا خشة ولا طلعة غير راسي و راس الاولاد نعاني فيهم و في إمتحناتهم .

خيرية : هكي لا طلة لا كيف حالك لا وين جيتي حتى تليفون بالكذب مافيش اللطف يا ربي .. خيرك اللعفو لين اندوروك أحني .

تركية : قتلك مش فاضية اللطف خيرك انطرشتي ,, بالله خلينى توة برى هدرزى على وحدة تانية فاضية انى لاهية فى عبيداتى نعاني فيهم يا هدرزي تهدريز كويس ايوا .

خيرية : اللطف اللطف اللطف و شنو قولنا أحني ,, و عبيداتك هوينة بوهم يلهاء بيهم .. شنو كل شي فوق راسك اللطف يا ربي .. شنو هذا العفو .

تركية : بالله ما تزدنيش على ما بيا و خليني في حالي انتى الباين بتشدينى بالدوة وانى الهم كله فوق راسى و مش ناقصة تره .

خيرية : خيرك اللطف يا ربي حتى من مسعودة هديكة المنجوهة يلي فوقك لعندها 10 اولاد مش مدايرة زيك و مش حاصلة فيهم الحصلة هذي

تركية : و شنو عاجبك فيها مسعودة و شنو عاجبك في صغارها يلي طالقتهم طولهم طول عصاتهم .

خيرية : ايه يا وخيتي والله طالقتهم طولهم طول عصاتهم و في كل شي مخششين روسهم ولا مدورتهم ولا حاكمة فيهم اللطف يا ربي ... سمعت بيهم خششو روسهم إمبارح و حصلو قريب 5 شقق .. فالحين فالحين يا وخيتي يا ريتا صغارنا طلعو زيهم .

تركية : فالحين والله قهرتك يا مهبولة يا متجقجقة ... تـ هذه مسعودة مش مدورتهم و مش معرفتهم الحلال من الحرام ... و الشقق يلي نقزو فيهم أهما شنو تسحبيهم حليليات تـ ماهو حرام و حتى الصلاة و العبادة فيهم حرام و ما يقبلهاش ربي .

خيرية : تـ بالله فكيني منك و من دوتك الفارغة .. تـ أما حرام و من قالك حرام .. تـ الرزق رزق الدولة مش رزق مواطن و رزق الدولة مش حرام ... حتى انى بنمشي نقول لصغاري برو بالك يحصلو شقة ولا أثنين .

تركية : تـ بري أمشي من اعليا اطلعي من حوشي .. ماك زيك زي المنجوهة هديكة يلي فوقي .. فالحين غير تاكلو و تحشو في مصرينكم و مش عارفين تميزو بين الحرام و الحلال ,, شنو يجيبولكم صغاركم تاكلو ... تـ أطلعي أمشي من عليا يا عطيك كية لفعة ملوية ان شاء الله .

خيرية : اقعدي انتى غير تفرجي من بعيد و كولي روحك و اولاد الغير محصلين كل شي .

تركية : لا يا وخيتي مش ناقصة انا ناكل الحرام ... نتفرج من بعيد خيرلي و خليني بعيد خيرلي .

خيرية : تـ خيرك انتى ما تفهميش ولا شنو ,,, تـ هذا رزق دولة مش حرام مش حرام يا مجنونة .

تركية : تـ الباين انتى يلي ما تفهميش مش قولتلك اطلعي من الحوش .. بري اطلعي مش ناقصة دوتك الفارغة تحلليلي في الحرام .. يلا بسلامة بري لمسعودة زيك زيها

خيرية : على كيفك يا وخيتي ,, مش تقولي خيرية ما جتش قالتلى ,,, يلا بالسلامة

تركية : الحاجة الباهية يلي جاية تقوليلي فيها .. بري امشي من عليا ما شوفت منك سلامة

[ندعوك للتسجيل في المنتدى أو التعريف بنفسك لمعاينة هذه الصورة]


قالك كول رزق الدولة ,,, ماهو رزق الدولة مش حرام ,,, بدو يحللو و يحرمو على كيفهم


اى شخص يقول هكذا أقول ,, أقول له

دٌر للوراء و عٌد من حيثٌ أتيت
منقــــــــــــــــــــــــــــول