هدرازي بين الحاجة ارقية و الحاجة مسعودة

هدرازي بين الحاجة ارقية و الحاجة مسعودة

الحاجة ارقية : وينك يا وخيتى يا مسعودة معاش اطلي علينا حتى بالكذب

الحاجة مسعودة : متغششة منك يا وخيتي الشهر لفات طليت اعليك مشيتي تقضي و سيبتيني مقعمزة بروحي .

الحاجة ارقية : والله يا وخيتى لهيت الدماغ قداش منه الضغار من جهة و الحوش من جهة و الشيباني من جهة .

الحاجة مسعودة : وين بنتك هديكة البايرة ما اتجيش تعاونك و هي 24 ساعة راسها و راس التتنت ولا شنو يقولوله هوا .

الحاجة ارقية : تعبتنى يا وخيتى و عييت منها و ريقي شاط و النهار وطوله وهى على هداكة المصيبة الهرتنت ولا شنو اسم مصيبته هوا ... معاش عرفت شن ندير معاها ؟

الحاجة مسعودة : زوزيها زوزيها و تفكي من مصيبتها مدام مش مديرتلك فايدة في الحوش .

الحاجة ارقية : والله يا وخيتى يا ريت خلى نفتك منها وتشد حوش راجلها وتلهى بعزوزتها و براجلها .

الحاجة مسعودة : تي هذي بايرة بايرة يا وخيتي حتى يشوفوها ما يعدلوش عليها و ما تتحركلهمش شعرة من جهتها .

الحاجة ارقية : قولى كلمة خير العفو وانتى تنقرزى عليها النهار وطولة ما اعيتيش اللطف يا ربي .

الحاجة مسعودة : ماهو بالسيف بالسيف يا وخيتي مش طالعتلك انتى في صغرك ما كونتيش هكي بايرة كنتى فالحة و محرارة .

الحاجة ارقية : و انتى المشفشفة يلي عندك شنو تعلمت التطيب و التصوبين ولا زيها زي لعندي ؟

الحاجة مسعودة : بنتي على الاقل تعرف ادير الدحية المطبوخة و تحطهالي قدامي .. ان شاء الله نشوفها عروسة يا ربي يا سيدي .

الحاجة ارقية : طيح سعدها هى و الدحية المطبوخة امتعها ,, الصبايا توة يا كبدى يعصدو فى البازين و يديرو في العصبان و انتى تقوليلى دحية مطبوخة .. برى برى يا كبدى علميها حاجة تنفعها في حوش راجلها .

الحاجة مسعودة : طيح سعد بنتك هديكة البايرة ,, ربي ما يطيحلها سعدها بنيتي ,, و الدحية المتبوخة يلي فوق البازين من بيطيبها كان مش من بنيتي ,, امالة بنتك البايرة تضرب على دراعها و طيب الدحية المطبوخة يلي حتى التقشير مش عارفة طريقة تقشيرها .

الحاجة ارقية : بنت ولدى الى عمرها 7 سنين الدير فى الشكشوكة لو كان بنتك ادير في المطبوخة .

الحاجة مسعودة : بنت ولدك هديكة سلم اميمتها لتعلم غير الفلاحة مش طالعة زيك معلمة بنتك غير البيارة .. لالا يا وخيتي في صغرك ما كنتيش بايرة توا لما كبرتي فرعنتي .

الحاجة ارقية : اني بايرة .. تيح سعد العار .. و منو يلي قيملكم عراسكم و حزانكم .

الحاجة مسعودة : هداكة في صغرك يا وخيتي و بنتك مش طالعتلك توا في صغرها و شادتلي غير هداكة المصيبة الهتنت .

الحاجة ارقية : عندك الحق يا وخيتي ..ان شاء الله اتجيلة قطعة فيهاليومين و نفتكو منه مصيبته .. ( مع مرعاة لصق الـ فيه و كلمة اليومين )

الحاجة مسعودة : ان شاء الله .. ان شاء الله .. يا ارقية بالله ما تقوليليش وين ولدك هداكة الطويل بلا غلة معاش يبان اللطف يا ربي ؟

الحاجة ارقية : يخدم على رويصته يا كبدى ان شاء الله يا ربى نشوفه عريس ونشوف صغاره و انتى يا كبدى هالعادة الى فيك لاهية بصغار الناس و مش لاهية بصغارك ..شنو هالجيرة الحرفة هاذي .

الحاجة مسعودة : اني الطويل بلا غلة يلي عندي يا كبدي شادلي هديكة البرويطة و يكري عليها و يقيم في السعي و الخضرة و يقولي فيها فلوس فيها فلوس و سيبلي حتى قرايته يا وخيتي معادش عرفت شنو بندير معاه غالبني غالبني .

الحاجة ارقية : يا وخيتى توا إنتى بتروحي لحويشك و انى بنرقد ما تنكديش عليا فى هالليل و برى نكدى على شيبانيك و اشكيله على ولده يلي شاد البرويطه و مسيب قرايته .

الحاجة مسعودة : شيبانيا مش عارف وين متركن هوا و الشيابين في واحد من الخزازين و يلعبو في الكارطة و يروحلي في عقاب الليالي حتى هوا غلبت معاه و معادش عرفت كيف بندير بروحي .. شنو بنسيبلهم الحوش و نهج في عقاب عمري .

الحاجة ارقية : يا كبدى انتى تهزى فى راسك وخلاص مش عارفة تربى صغارك ولا راجلك طيح سعدك ومزالك .

الحاجة مسعودة : يا وخيتي جاني السكر في جرايرهم و مزال بيركبولي الضغط هدا يلي مزالي .. شيبانيا راسه و راس الكارطة و مش معدل على الهيدوك الطويل بلا غلة يلي شادلي البرويطة و يقولي فيها فلوس فيها فلوس .

الحاجة رقية : والله سلمي امرك لربى انتى وصغارك وشيبانيك الى ما عرفتيش شن اديرى معاهم .

الحاجة مسعودة : و انتى شيبانيك شنو مداير حتى هوا مزال راسه و راس العقرب ريح ما يباش يبيعها و يرتاح في عقاب عمره .

الحاجة ارقية : شيبانيا مداير فايدة عالاقل من العشية للعشية يشد بها المحطة ويجيبلى هادكم الـ 5 ولا 6 جنيه .. يا كبدى خايفة غير يوم من الايام لا يخطفوه هو و العقرب الريح امتعه يا وخيتى .

الحاجة مسعودة : لالالا هدي ما تخافيش منها شيبانيك ما يطمعوش فيه لا هوا ولا العقرب ريح متعه .. اسكتي اسكتي بلا تزعبين زايد متع عزايز .

الحاجة ارقية : والله يا وخيتى الدنيا هادى تخوف ,, نخاف عليه يا كبدى مش شيبانيا حتى هوا .

الحاجة مسعودة : كان هدا راهو خطفو وليدي العمروس الطويل بلاغلة و هوا 24 ساعة يلود في القوايل هوا و البرويطه متعه .. شيبانيك حتى يخطفو عمره كمل لكن وليدي شعوبة مزال في خيار عمره يا وخيتي .

الحاجة ارقية : وشن امالة تحسابيهم بيطمعو فى هاديكة البرويطة اسكتى بالله اسكتى بلا دوتك الفاضية .

الحاجة مسعودة : و شنو مش مالي عيونك الطويل بلا غلة و انتى نقزتي كانش على البرويطة

الحاجة ارقية : يا وخيتى وشن عاجبك فيه الطويل بلا غلة يلي عندك انتى بروحك قلتي اعليه طويل بلا غلة .

الحاجة مسعودة : مهما يكون كبدتي كبدتي كبدتي يلي جيبته من بطني و نحسه حتى طويل بلا غلة سيوره يكبر و يعقل غير كان يوليلي لقرايته و يلوحلي هالبرويطة يلي شادهالي بس .

الحاجة ارقية : ديريله حل قبل ما يفوته الوقت هالطويل بلا غلة .

الحاجة مسعودة : ما يسمعش في الكلام مش عارف لمنو طالع يا كبدي حتى بوه أول ما اخديته مش هكي يسمع في كلامي و الكلامه يلي نقولهالة يجي في طوعه إلا المكسور هالرقبة هذا .

الحاجة ارقية : حقي قوليلي شنو صار مع مكسورة الرقبة مرت ولدك الكبير سمعت بيها قايمه خشمها اعليك .

الحاجة مسعودة : يا وخيتى شدها راجلها اعطاها كليمات باهيات يا كبدى خلاها تمشى عالصراط المستقيم ,, والله يا كبدى انى ما نرضى فيها حاجة حتى هى مرت ولدى كبيدتى يا حنة شن بندير ربى يهديها وخلاص ... وانتى كيف عرفتى يا حنة ؟

الحاجة ارقية : خيرك قرنتي حواجبك أعرفت من الجيران اللطف يا ربي .. مرت ولدك مشاء الله اعليها ماعندي ما نقول فيها لكن مشكلتها تمشي بودنها و تعبيلها في راسها لفعة هالسبعة روس أمها الحرفة هديكة .

الحاجة مسعودة : حرفة لروحها تمشي بحروفيتها بعيد اعلينا .

الحاجة ارقية : شنو مافيش طويسة شاهي يا مسعودة حتى بالكدب و انى من بكري نقول اهي تنوض اهي تنوض .

الحاجة مسعودة : إإإإإإإي فكرتني يفكرك بالشهادة ان شاء الله ,, الدوة خدتنا ,, هاني نايضة توا .

الحاجة ارقية : لالا ما اتعبيش روحك يا حنة هيا بالسلامة توا ,, و توا نمشي نروح يديرلي طويسة الشاهي الطويل بلا غلة يلي عندي .

الحاجة مسعودة : بالسلامة يا حنة و سلميلي على الصغار .

الحاجة رقية : ان شاء الله ان شاء الله يوصل

منـــــــــــــــقول .

تهدريزة مش من دون

شكراً رزق
[ندعوك للتسجيل في المنتدى أو التعريف بنفسك لمعاينة هذه الصورة]

شاكره لك مرورك الكريم والطيب

شكرا علي الهدرازي منوار المنتدا اخي رزق

امنور المنتد بوجوادك

كل التقدير والاحترام
على روعه التواصل

هدرازي فكرة رائعة رزق ياريت لو تستمر عليها وتجيبلنا هدريز تانية ,,وطبعا مش صعبة هدي,,ما فيش اكتر من الدوة,,
رزق عالعادة الحروف تعجز امام ابداعتك دوما تمتعنا بكل جميل وجديد ,,
تحياتي

شكرا رزق هدرزة شاهى مش عادية
الله على ايام زمان

ياساتر استر توقعتها تختم على مشكلة كبيرة ،،
واللي وجعني البنات اللي ماحصلن قدر معاهن ،،

منور خوي رزق وفي انتظار الجلسة الجاية
تحياتي لك

بارك الله فيكم

على مروركم الكريم

وحفظكم الله

شكرا لك على الموضوع الرائع
لك أجمل تحيه وتقدير

اسعدنى تواجدك فى متصفحى


بارك الله فيك احسنت تقبل مروري شكرررررررررا تحياتي [ندعوك للتسجيل في المنتدى أو التعريف بنفسك لمعاينة هذه الصورة]

» اللي ما يعرفك يجهلك !! مواقف !! هدرازي