يـا بـوي ليتـك حـيّ وتشــوف حـالي

يـا بـوي ليتـك حـيّ وتشــوف حـالي
تشوف وش هو صار من بعد فرقاك؟

صـار الوطن بعـدك من الناس خالي
صـار (الوطن غربه) بعد ما فقدناك

يا بــوي أنـا بعـدّك ســهير الليـالي
مقهورة من دنيّاي منّا ... ومنّاك

حـدتني الدنيــا وأنــا راس مـالي
إني عزيز النفـس مثلك وشرواك

مـا فيـه شــيٍ فـي حـياتـي صــفا لي
حتى الورود إن جيتها صآرت أشواك

أطيـح واحـمـولـي عـليّـه إثقـالـي
وأتخـيلك مديـت لـي كـف يمنـاك

بعدّك ولا مره ترى إرتاح بالي
أصفّق على كفي ندم وآتحراك

ومن ضيقتي يا كّم أصّدق خيالي
وأقـوم أدوّر عنّك وآقول بـ القاك

أضيـع بالعـالــم وهـمـي ســـؤالـي؟
هو أنت؟ وينك؟ ليه ماعاد شفناك؟

أدري لو إنك حي يا أعز غالي
يُمناك تفزع قبل ما جيك وانخاك

ويلآه .. يا حالي وما هو جرالي
ويلآه .. يا قلبٍ تعـذب فـ طرياك

ويلآه .. يا بـوي مـن أول وتالـي
لا والله..أول كـان ينجـيني إدعـاك

واليوم من بعدك وش اللي بقالي؟
غير إني أدعي ربي يغفر خطاياك

يـا الله حـطّه وســط منـزآل عـالـي
في جـنة الفـردوس يا رب الأفلاك

واغـفـر ذنـوبـه .. يـا عـزيـز الجـلالي
واشرح لي صدرٍ ضاق من جّور دنياك