يابحر كميها

مرحب بيكم من جديد مشاركتي اليوم للشاعر ابوبكر رابح الزوي من مدينة عين الشعر اجدابيا
انشاالله تجد القبول عندكم.
عندي حكاية يا بحر كاميها .. أمفيت انت ما عندي لمن نحكيها
حــــــــكاية غالي .. عدّا وخــــلالي سمور ليالي
هو غاب وانا زاد غاب دلالي .. وخـلا العين ديما منفلت ماقيها
يمين حالفه ما عاد تالف والي .. رضيت الياس وياسها راضيها
لا لها عدو ولا عاد تريد غوالي .. رصيد م الكواين عزها يكفيها
ولا تريد ضحك ولا تريد تسالي .. تعـشق الحان الياس وتسليها
يجتمعو مع نسمة الليل التالي .. عطاشـنه اتجيه وكاسها يسقيها
ولمباكر تنوض مهوطه وتخالي .. مفعوله قوي بالحيل ومقسـيها
ونا يا بحر تميت كاره حالي ... لاعــرفت ننهاها ولا نرخـيها

حــكـــــــاية ياســـي .. الطايل اللي منه اكبر وسواسي
على اثر موح مستاصل ابقي مجلاسي .. صعب مع اللي قعدته شاهيها
والوقت جرني جرة زعيم سياسي .. دخــلني دروب ضلال ما نبيها
واعدمني الثقة في قرايب ناسي .. كامي عليــها ما لــحد نشكيها
علي صغر سني ذقت مرّة كاسي .. مفطوم ع الكواين فرحتي ناسيها
ولا ارضيت لا نرضى نواطي راسي.. الدنيا سواء عندي الله ناشيها
ولا نقترب م اللي كبار كراسي .. عصران نفس خالقها الله يغنــيها
وحتى ان كان هو بيد حديده فاسي .. جبال دنيتي لازم انخش علـيها
يا نموت فيها يا يصير خلاصي .. ونلقى اصحاب عقول ونغالــيها
وما خانّي صادق معاي احساسي .. متوقع بشاير خير مــستوحيها
ايجي يوم ونثور ضد افلاسي .. ونركــن قوانيــنه ونستثـنيها
وتسمع بعد سكتة اصوات اجراسي .. تعلن لحـظة فرح متــمنيها
وانت يا بحر للصوب فيك مراسي .. لازم ابواخر العاشقين اتجـيها
وانت سبب عله وفيك مآسي .. يصيرن امغير المـوج يمـحا فيها
ونا علي شطك نفض اكياسي .. حكــيت لك بقصة للنجوم ارويها

انزاحــــت داره .. الــيوم يا بحــر عــني عزيز توارا
عدّا وخلا ف الكنين اشاره .. مرسومة وما اساع صار ما يمـحيها
ولنظار تمن حايسات سماره والنـــفس شارها قعده مع غالـيها
تناوض علىغفلات لوعة ناره .. ونصبي بحيل جهدي ونوا طيـها
اووين ما درست القيتا منهاره .. افكــاري قديمة بذكره ارابيها
وقعة خواجه في عرب قمّاره .. علايل وهــــم وياس متـكفيها
وقعت بينهم وانست كل اخباره .. الغالي وتمن هن اســباب التيها
وانت علي شطك هناك مناره .. ترشــــد التايه من بعيد ايجيها

مشكور على النقل
وعلى اختيارك
الرائع

تحياتى