الشاعر و الناموسة

هذة القصيدة للشاعر محمد جعفر عندما كان يعمل في حقل السرير وعندما اقلقت نومه ناموسة(بعوضة)تحاور معها في الشعر حيث قال لها



عدي غادي***زنينك حرمني من لذيذ إرقادي....وأنتِ فاضيه

قال الشاعر:
عدي بره**وزنّي علي كيفك طليقه حره
زنينك علي ودني أيزيد مضره**بهموم واجده غيرك حشيت اوسادي

ردت الناموسة :
عشاي انريده**انحوم أحدا الناعس انبز وريده
تبخل عليا ليش لا ياحميده**البخل عيبا من ربت ضنا لجوادي
* * *
قال الشاعر:
باهي وليش اتزني**إن كان الطلب في الدم خودي مني
كمين جرح في الخاطر وما ضرني**يا بال شفطه من عروق عضادي

قالت الناموسة:
انزن انجرب**مش قصد عندي للمنام أنخرب
إن كنت فاطن ما احداك انقرب**وان كنت راقد غايتي ومرادي
* * *
الشاعر:
سيبي داري**كذا شرقي زوري .... اشعبا ..... جاري
تلقيه دمه حلو سكر جاري**اتنوشيه باليبره ايجي بدادي

الناموسة :
لاما نزوره**جارك أن جيته طحت في المحدوره
امجهز أنواع افليت شي خطوره**البايجون مع القاتل امعا الصياد


الشاعر :
راني***فكرتلك ولقيت واحد تاني
ايش رايك براجل حمر كي للماني**اعموره ولد فارس كريم وهادي

الناموسة :
لالالا هذا راجل حامي**لاتعرفه من الغرب لاهو شامي
ملسن ويطقطق ابكل كلامي **وان كانه تعقد راح منك غادي
* * *

الشاعر :
الثالث قاعد**ويسكن قريب مو اللي متباعد
متبرع ابدمه فالمريض ايساعد**داره احداي أوبوه شيخ ارفادي

الناموسة :
آه هذا جيته**راجل مطافي لابس العفريته
اوزرته اوهو راقد اوما مسيته**الباين عليه بخيل خارب نادي

* * *
الشاعر :
ترا عدي شوره**راجل علي كيفك أو لاعب كوره
عزو ابجاوي حجرته مشهوره**وانكنتي سعيدة حظ تلقي بادي

الناموسة :
عزو هارب**من يوم سيبه حمزه اوجوه خارب
انخاف نقصده مره اوهو موطارب**أيقطع اجناحاتي وتمشي عادي

* * *
الشاعر :
عندي ماره**بيها ننعتك وتلقي وصايف داره
ساع تاخدي منه حكر مطاره**ما يندري عنك خبر في وادي

الناموسة :
ملا ملا**دمنقل كبير أتقول كورة سله
لو كان اندهن بالزيت يلصف كله**إن كان من عليه زلقت كيف انفادي ؟؟