قصة مأساوية ليبية

السلام عليكم ورحمة الله وبركاته

اليوم جايكم بقصة اقل ما يقال عنها أنها مأساوية..

كنت مقعمز في الحوش وفاتح الراديوفي النقال وحاط عالشبابية ولقيت بنية مسكينة تحكي في قصتها .. اني ما لحقتش عليها من الاول .. لكن بنقوللكم اللي لحقت عليه .. وبارك الله فيها البنية اللي تحاملت علي روحها وحكت قصتها .. بيش تكون عبرة لجميع البنات زي ما قالت ...

قصة البنت المسكينة انها في يوم من الايام جاها راجل قنين وحالته المادية مرتاحة بيخطبها .. وجاب معاه اخته الكبيرة (اللي هيا في الواقع مراته ) واخته الصغيرة ( اللي هي في الواقع بنته الصغيرة 6 سنين تقريبا ) ..

المهم الاخت قعدت تحكي علي خوها انه طيب وكويس ويدور في بنت الحلال اللي تشاركه حياته ... وطبعا امه ما جتش معاه علي اساس مريضة وتعالج في المانيا وقاعدين معاها خوته وخواته التانيين .. وهو اللي متكفل بجميع مصاريف العلاج .. بالاضافة الي انه يبني في حوش و بدي في كل مرة يجوها زايرين يجيبلها في صور ويقوللها لـ وين وصل في البني ..

اهل البنية مشو سألو ع العريس وين ما يسكن (السراج تحديدا ) .. وقالولهم صح الولد هذا طيب وكويس وعنده امه في المانيا ويدوروله في عروسة ..

البنية المسكينة فرحت بـ ها الخطيب التحفة واللي هو حلم كل بنية زي ما قالت خصوصا انه هي اكبر منه (زي ما فهمت) وجمالها عادي يعني من لافت او مميز (لكن المميز انها متخرجة من التقنية وزادولهم معاشاتهم!!) ... فـ الخلاصة ان البنية عاشت فترة 3 اشهر من اجمل 3 اشهر في حياتها .. وشرت حوايجها والهدايا ، وصاحباتها واحبابها يباركولها وحددت حتى موعد العرس .. لكن الاخت قالت للبينة المسكينة انها ما يبوش يديرو عرس لانه امهم مريضة وغر يبو يزوجو خوها بيش يفرحو امهم قبل ما تطرلاها حاجة ..

المهم قبل موعد العرس بشوية جاها وقاللها انه مش حيدير عرس وانتي افرحي واعزمي صاحباتك واحجزي صالتك .. المهم البنية قالت باهي وبدت تعزم ، وقريب تكمل فرحتها مسكينة ... والبنية تحكي وتبكي مسكينة والله بكتني معاها ..

المهم وهوا يكلم فيها شرين تليفونه (واحد من صحابه كلمه ) وعلى اساس انه النجار متع الرواشن قاله راني صبرت عليك هلبا ولو ما تجيبليش الفلوس (8 آلاف )في خلال ها اليومين هادوم انساهم الرواشن .. المهم الراجل تضايق و وجهه تغير ونكّد فـ هيا حست بيه مسكينة وقالته اني محوّشة تحويشة العمر وتو نعطيهوملك تخلّص بيها حق الرواشن ... وهو اصلا حوشي يعني ما فيش مشكلة لو ساعدتك (وقعدت تبكي بعبرتها هني مسكينة) .. المهم قاللها خلاص ناخدهم منك علي وعد انك حنردهملك في خلال يومين .. مشي وافقت وجابتله الثمانية آلاف في اليوم الثاني الساعة العاشرة صباحا تحديدا ... المهم قاللها تو اني بنمشي نخلّص الراجل ونرقد شوي ونكلمك ... فات العصر وماكلمهاش وفات المغرب وجي العشاء .. وما تكلمش راجل الاحلام ... المهم رقدت البنية وكلماته الصبح لقاته مقفل .. تكلمت تاني وتالث ورابع والراجل فص ملح وداب ...واختفي أثره .. وبعدها كلمت خوها ومشي زاد سال عليه أكثر .. وهني كانت الصاعقة .. قالوله هذا نصاب كبير ومعروف مداير عصابه هوا ومراته وديما يضحكو علي بنات الناس .. وهذا مش اول مرة يديرها ...

البنية المسكينة من غير الفلوس اللي تخدم عليهم ليها سنين من الـ 8 الى الـ 3 يوميا ... كسر بخاطرها وهذا اللي واجعها .. وشمّت فيها الناس وفرّحها بالكذب .. الله ربي ينتقم منه ان شاء الله ... ويرد عليه اللي يدير فيه في بنات الناس ..

المسكينة مرات توقف على الكلام بسبب البكي والعبرة .. وفي نهاية حديثها قالت انها بتحكي قصتها بيش تكون عبرة لكل وخياتها بيش يردو بالهم ويسألو كويس على الخطّاب .. وقالت ان الدنيا خلاص جابت ما عندها .. والحق يقال ان الدنيا جابت ما عندها ..

اني وجعتني البنت لدرجة لا تصور .. وحبيت نحكيلكم حكايتها وتشوفو الناس العديمة الانسانية لا وين وصلت ... والله والله والله لو فيه ذرة بس .. ذرة انسانية ما كان يفكر في حاجة من الحاجات اللي دارهم للبنية المسكينة .. يا ريت خنب فلوسها بأي طريقة تانية ما تجرحهاش راهو وجعوها الفلوس شوية وبعدين نست .. لكن الجرح اللي جرحهولها الله اعلم كيف تقدر تنساه ...

اني بنقول البنت لو تقرا في موضوعي .. اصبري على هذا الابتلاء .. وقولي انا لله وانا اليه راجعون .. والله اذا احب عبدا ابتلاه ... والرسول صلى الله عليه وسلم يقول ( ما يصيب المسلم من نصب، ولا وصب، ولا هم، ولا حزن، ولا أذى، ولا غم، حتى الشوكة يشاكها إلا كفر الله بها من خطاياه ) فإن شاء الله تكون كفارة لخطاياك ... وفي النهاية ان شاء الله ربي يعوضك خير ... وربي يهدي من خلق ..
البرنامج يجيبوا فيه يوم الثلاثاء عالشبابية
والسلام عليكم ورحمة الله وبركاته ...