علاش الليبيين هكي

فيه موضوع حاب نحكي عليه شويه

أو بالاحري إنفضفض علي قلبي شويه


موضوعي ومنغير تطويل

علاش الليبيين هكي

علي ما أضن ان كل الاشخاص وبمختلف الاعمار والاجناس

الناس اللي عايشه في ليبيا

علاش لما إتقول احد ليبي كأنك قلت صفات

وحاش القله القليله

مصالحي طماع غشاش مش حضاري



أضعف أمثله

علاش أحني الليبيين لما إنكسروا طريق نقعدوا سنين

باش إنصلحوها وفي الاخير إنكملوها مايفوتش شهرين

وتلقاهم إكسروا فيها من جديد علي اساس إنسوا إركبوا

طوبوات الميه ويبيلك شهرين وإلا ثلاثه باش إصلحوها

ومايفوتش شهر وكسروا من الاول وجديد قالوا إنسوا إمشوا

خيوط الضئ وكذلك يبيلك باش إصلحوها وتولي الطريق أحرف

من لما كانت عليه قبل ما يصلحوها

وفي الاخير ماعندك شني بتقول

علاش الليبيين هكي

قلنا نسألوا علاش هكي

رد عليا مهندس بجواب أفحمني بالرد

قالي كيف بيخنبوا كان ما دروش هكي


ولو تمشي أضعف الايمان لتونس دوله فقيره

ما عندهاش البترول مستحيله تلقى شارع واحد

فيه تكسيره صغيره



باهي علاش الليبيين هكي



في المدارس تلقى مدرسات ومدرسين

يقولوا الغش ممنوع طبعا انا معاكم ان الغش

من أعظم الظواهر السلبية حاليا في مجتمعنا الليبي

المهم تلقاهوم إيقولوا لا للغش والغش حرام ونهانا نبينا عليه

والمشكله أطفالهم والا أقاربهم وحتي معارفهم

تلقاهم وقت إديروا في الامتحانات بدات الشهايد

يدخلولهم في نماذج الاجابه وهما اللي يبدوا يكتبولهم في الحل

في النموذح وبعد ما يكمل الامتحان تلقاهم طالعين ويقولوا

ما إتغشوش الغش حرام توه بالله عليكم بأي تعبير

تبوني نكتب عليهم



ومثال ثاني في التعليم أطفالنا اللي في صف

الاول والثاني والثالث يبدوا مدرساتهم يتلفوا بألفاض

حشاكم قبيحه علي الطلبه وبعدين إروح الطفل للحوش

ويبدأ إيقول فيها علي بوه وأمه وخوته طبعا عقله قاعد مش

مدرك لانه هو مزال صغير والكلام اللي يقول فيه يحسابه كويس

لانه سمعه من المعلمه إمتاعه هذه المعلمه اللي المفروض تكون

القدوه للطفل لان أهم مرحله من مراحل الانسان هيا طفولته وهيا

اللي بتحدد بداية شخصية الانسان ولما تمشي بتتناقش في الموضوع

هذا مع أحد المعلمات تنوض عليك بسبعه السنات وتقولك ( هذا ولدك

الوحيد اللي في الفصل اللي قالبها فوق دماغه وكان انا مش عاجباتك

امشي حول ولدك من فصلي والا حطه في مدرسه خاصه

شني انت والا ولد اللي إتخلصوا فيا )

معناها كيف بتتفاهم معاها

توه الدول التانيه لما معلمه تقوم بشئ زي هذا تعتبر جريمه

بحق الطفل حيث ان المعلمه القدوه الاولا في حياة الاطفال


مثال ثالث في التعليم

الجامعات والغش فيها معقوله طالب جامعي

مهندس والا محامي يطلع مفاهم راسه من رجليه

وأكبر مشكله وأعظمها مشكلة اللي يطلع دكتور بالغش

يحساب أرواح الناس لعبه بين إديه وفي التعيين تلقى

دكتور مثقف محترم فاهم مايتعينش وتلقى واحد علي

اساس دكتور وهو مش فاهم شئ تلقاه إتعين لان الواسطه تاخذ

مجراها تلقاه يا إما بوه واصل في البلاد والا تخدمني نخدمك




صحيح ان الشئ هذا سائد في أغلب الدول

ولاكن بنسبه رهيبه في ليبيا

حيث ليبيا الان أي شئ تحتاجه لازم إتكون عندك فيه

واسطه أبداها بطابور الخبزه



باهي علاش الليبيين هكي





علاش لما اول ما تشبح شجره طول إتجي

وتكسرها وكان إشبحت ورد زارعينه في وحده من

الجرادين طول يمشي وقطحهم ولما إتجي إتقوله

علاش درة هكي إيقولك عادي خيرك مش ليبيين أحني

معناها شني يقصد بيها الكلمه هذه هل ان ليبي = الفساد

باهي علاش وقت إتصير عركه في واحد من الشوارع

وتلقاها خاشه بعضها حشاكم اللي يشتم واللي يلفظ في الفاظ قبيحه

وإتجي إتكلمهم تقوللهم يا ناس عيب الدوه هذه راهو فيه حياش

بحداكم وعائلات وناس محترمه خاطمه علاش الدوه الزايده هذه

إيقولولك رانا ليبيين عادي

شني منقول والا بتقولوا عليهم الناس هذه بصراحة ما عنديش أي

كلام يعبر عليه

توه إطيحوا في هيبة وإحترام المواطن الليبي

باهي علاش ياليبي هكي

رغم لو تسافر لاي مكان واتقول انا ليبي

في مصر وتونس يعاملوك معاملة الملوك

في دول الخليج وحتي في الدول الاوربية إحترام غير عادي لاحظ لو

اتلاقوا مثلا مصري تونسي مغربي جزائري سوداني صومالي

ليبي في اي دوله أكثر شخص ينال الاحترام الليبي

باهي علاش ياليبي هكي

شوفوا ياناس أعظم تاريخ مشرف للجهاد عندنا أحنا في ليبيا

أعظم شهيد شيخ العروبه اسد الصحراء عمر المختار

الشخص اللي دوخ وحده من أعظم الدول في ذاك العصر إيطاليا

وبعدها طردنا القوات والقواعد الايطالية والامريكية بفضل قائد الثورة



تاريخ مشرف حافل بالانتصارات


باهي علاش أمالا الليبيين هكي

شئ بكل أسف نتأسف عليه


موضوعي يحاكي الواقع اللي عايشين فيه حاليا

مدى التخلف الثقافي والطمع عند أغلب المواطنين الليبيين




إخواني أخواتي سؤالي بسيط جدا جدا جدا

علاش الليبيين هكي



أرجوا من الاخوه والاخواة الكرام التفاعل

في هذا الموضوع

ولو بجمله

ولو بكلمه

ولو بحرف

يحكي واقعنا الحاضر






.

المواطن الليبي مغلوب على امرة يفش في غلة في الكلام البذي والتكسير في الشوارع فالاب يجري طوال اليوم ليؤمن قوت اولاده والراتب لايكفي شي فكل شي بفلوس حتى الدراسة الي كانت بالمجان والراتب لا يعمل شي .....
وبعدين لعدم وجود راقبه ففي تونس مثلا لوجاءت شكوى من المريض على الممرض او الدكتور يكون في خصم وقد يكون طرد اما عندنا وصلت الى الموت ولا احد يتكلم والدكتور كأنه ترقى فكيف سيهتم بالصحه وكذلك المدرس معلم مسؤول عن 5 فصول و5 مراحل كيف يهتم بتوصيل المعلومه قد لايعرف حتى اسماء الطلبة وووووووووووو
انا اتوقع ان الموضوع من سئ لاسوء وسيأتي ليش الليبين ماكانوا هكي يعني نحن اللاان في خير ....
الحمد لله

ومن ليبيا ياتى الجديد