الليلة كلامي ياعزاز عليه .. عللي جرى هالوقت واللي كان

زائر

الليلة كلامي ياعزاز عليه .. عللي جرى هالوقت واللي كان
وعللي نقص ف الحب خان الغيه .. وعللي وفى بالعهد ياحبان
وعللي تغطرس كي ركّب عربيه .. وعللي تواضع ف الطبايع زان
وعندي علل واجد وموش شويه .. عللي تخنفس نين شكله شان
فوق م العواتق غفته مسفيه .. تحلف سوالف نازله ع الذان
واللي ملا جيبه من جواز بنيه .. وغصبا عليها راه موش انسان
واللي فتن بين الحبايب سيه .. واللي مشا في صلح مو ندمان
واللي عرف ربه بجد ونيه .. واللي مشى في جرة الشيطان
هاذين سبع ابنود بالعديه .. موضّح معاني جبت لك جرنان
اول بند عللي نقص ف الغيه .. وجاحد غلانا من ايام زمان
غالي عرفته قول عزّ عليّه .. سمح الوصايف ناقش الذرعان
الحاصل معاها عاد بنينا غيّه .. شوف الهميله فوق م الوديان
ان نا غبت عنها تنشد عليه .. وننشد عليها ف الغياب وكان
وكيف اتخّرف زاد تحلف بيّه .. ان نبنوا غلانا غصب ع العدوان
ونا من نصيبك وانت تقسم ليّه .. بجاه النذير وقاري القوران
وخيك اطامن قلت ساس الغيّه .. تعلى ويقسم بوحلق رنان
دزيت العواقل واطلبوها ليه .. ودونك اصنت جبت لك جرنان
ردوا العواقل ما قضوا مقضيه .. وخوتا وبوها خربوا اللي كان
وداروا العطيبه حجروا لبنيه .. وهدّم غلانا ع الوطا كيمان
ولولا معاهم في عقاب قضيه .. نقولك عليها بنت عيت فلان
وخيك ايموج مانسي ماضيه .. وننسى غلاها كيف ياحبان
من يومن تباعد بوعقود عليّه .. مولى السوالف راويه بدهان
ونا العقل خاف وحالته دونيه .. وغاب الطرب عنه بقي تلفان
سريب الغوالي نتركوا طاريه .. ونحكوا عللي م السّواقه بان
كلامي ع اللي كي اركب علاها .. وزقعد البيره والحشيش اجنان
اللي قبل داير حالته دونيه .. في جرة شواهي منصغي حفيان
ثويبه لبيسه زيد والطاقيه .. مبرغث نقاطي كي عليك ايبان
لا خش المدارس لافقي طرحيه .. وواخذ شهاده من معيز وضان
لا يعرف بصيره مفيت ماعجميه .. ولا عناق ترطز مع جديان
وحاله تغير في صبح وعشيه .. وطبعه تغيّر عاد سمية فلان
يعدي عليك اليوم في عربيه .. مطنش وناسي ان السلام امان
ان حقك تشاور دوب يشهر ضيه .. بقولة قريّب هنا وراد اعلان
وهو ف الحقيقه مندلف ف النيه .. مغير عاد افلوس ومنعمي اعميان
ولكن امثاله يا صحاب اشويه .. اكثرهم سعادي ف الطريق اتبان
اكثرهم تحشّم كي اركب عربيه .. اخلاق وتواضع ف الطبايع زان
ان ركب اشوّيب كان معاه وليه .. يطفي المسجل يركن الشرطان
عوايد قديمه ما نسيهنشيه .. يعد الملامه عاد بها دريان
ان راعى جماعه شاوروا لتكسيه .. يفرمل حذاهم واركبوا يا اخوان
سريب السواقه نتركوا طاريه .. نجو للخنافس في عقاب زمان
تخنفس وروّح عاد كي الوليه .. وطالق الغفه راويه بدهان
وفوق العواتق غفته مسفيه .. تحلف سوالف نازله ع الذان
وكسّر امشاط مالها عديه .. ولصّق عليها م العطور الوان
شينك وخيذه ريت ياخوتيه .. الراجل يزابي اليوم ف النسوان
ولابس محزقعاد كي البنيه .. مغير البنيه خير ياحبان
ان جاتك تموّج كي هميل الخيه .. وجافل استحرك ف الخلا عدوان
الحاصل تخنفس مشيته مرخيه .. وبلغه كبيره كي عليك اتبان
ان جا للعلاوي وقعته فوريه .. الحاصل تكربس فوق م الصوان
ولولا الكلام اساع ايطول اشويه .. نحكي لكم نين ايجي لاذان
ونجبد علل واجد وموش اشويه .. ولكن شغلني عاد سمية فلان
شايب ضلالي ليش دار خطيه .. ياشايب استحمد وابعد الشيطان
تملى اجيوبك من جواز وليه .. وغصبن عليها راك موش انسان
تقبض الحق وعطوتك لبنيّه .. لواحد ضلالي ليش ياحيوان
راحة بناتك خير م الماليه .. ياشايب تروّع قول ياحنان
هي موش بهيمه تبيعها بنقديه .. بدع وجربمه تجرة النسوان
بارك الله في مهر كان شويه .. وتذهب حبيبا كان بها ولهان
الدنيا معروفه طبعها مفنيه .. وتاجر الدنيا ياعرب خسران
وتوا كلامي راه جد شويه .. وكله معاني واسمعوا ياخوان
هللي فتن بين الحبايب سيّه .. كي من قتل روحن طاهره بايمان
يفتن وكله من سواد النيه .. الصوره بنادم والعمل شيطان
ان راعى خلايق عايشه وهنيه .. يخرّب عليها يصبحوا عدوان
وكان هو تبرّم وجا صداف قضيه .. عدوك تشيط ويكبر النيران
عايش اذنوبه مالها عديه .. ويوم ايتحاسب دفتره مليان
واجد عذابه راه موش اشويه .. يومن ايموت ويدفنه دفان
وربك امثاله كلهم جمليه .. محرم عليهم جنته سبحان
عقاب القصيده يا عزاز عليه .. علي اهل الكرم والجود والفرسان
اهل الكرم والجود والحنيه .. رباية عصّر والصدق واللامان
بوادي تعلو في فجوج خليه .. نواجع انطرحن فوق م الوديان
كحيله حذاهم مالها عديه .. ووراها ضناها يرتعن حيران
وما من سبيب بعدته مكسبه .. وواجد شلايا من معيز وضان
لايعرفوا توبيس لا عربيه .. مفيت ماجمل هجّر حذاه حصان
ولا ولعو بابور في علويه .. مفيت ما حطب عجرم معا مثنان
ولايعرفوا وكله علي صونيه .. مفيت ماقصاعي تشبع الجيعان
ولا يعرفوا نشرات لخباريه .. ولايعرفو ردون ولا جرنان
ولا عمرهم جرّو علي قبضيه .. ان كان هم احتاجو وقفوا م الضان
ولاعمرهم وردو علي حنفيه .. امية سما غاية اللي عطشان
ولايعرفوا بيره ولا حميه .. ولايعرفوا وسكي ولا قطران
راضي عليهم ربنا ونبيه .. اهل الوفا والصدق واللا مان
وقابل عملهم والزكاه نقيه .. وديما الصلا وصيام في رمضان
الحاصل رضي ربي وعايشه وهنبه .. وطيبك بنينه الشيح والقحوان
وما من بنت تحلف كما الحوريه .. تجيك اتمعنن ع الغلا سبحان
تجيك بحجايج في سريب الغيه .. تريد بغناوي ردها يافلان
ان كنك غشيم وعرفتك سطحيه .. من اول وجابك ياوكاب اتبان
اطنش عليك وتتركك ف النيه .. تدوّر علي غيرك اللي ولهان
تدوّر وتلقى من يقيم الغيه .. ويعرف سهاري بوحلق رنان
غلاهم قباله بالشرف والنيه .. ولاعاد نقاره لاحسود يبان
وداروا الملم الفرح فنطازيه .. وخيل اتمادح تحت م الفرسان
وبارود يربخ عاد كي القليه .. وجابوا العروس وذبحوا م الضان
ونختم كلامي بالصلا لنبيه .. علي عد حب الرمل ياحبان
صلاة النبي ديما بلا عديه .. تزيد عن عداد الوصف ياعربان

مشكور على ما نقلت

ولك مني كل الود والاحترام ..

زائر

شكرا لك الشاعر محمد بوحماله

» هالوقت
» كلامي علي الاجوادواهل الجود ...
» اختار أسمك هذه الليلة
» يا أيها الرجل كلامي موجه إليك فقط !
» امتي ... واللي عنده يزيد