عدّي مايهمك شئ

إنكان علي
لك الإذن عدّي مايهمك شئ
ما اتقول توجعني!!


لو تصدقني
ماتشيل همي البعد ما يضايقني

بلاش مد يدّك قولتك عانقني
خلها تجي هكي وسيب ايدي

قليل عزم لنقني أمغير اعتقني
وما تلتفتلي خير لك ولي

بدلتني بالغير يا مفارقني
جت ساهلة وبَـعدك جديد يجي

تعودت خونة كل من رافقني
يبدو الخطا مني وكامن في

نشرق نغرب شئ مو طالقني
ياسي ملازمني وبارم بي

سلمتله نا نلحقه ويلحقني
وبيني وبينه شئ موش شوي

إنكان علي
لك الإذن عدّي مايهمك شئ
ما اتقول توجعني!!
................
كذا خليني
عدّي فحالك من الوداع أعفيني

من دمعها خليك هذي عيني
نعرف دواها وبالعزوم قوي

لا نريد عطفك لا نريد تجيني
الخاطر بظلمك يا عزيز أرضي

وقسمي مخالف عارفه راخيني
وخونة أولافي دوم هيا هي

تلس في الجواجي جمرها باليني
تشيل وقت وتهبّي نعاود حي

لا لوم يلحق فيك لا يعنيني
ولا نجيب زولك في حديثاً كي

وكمل جميلك وين ما تلاقيني
عد ما علي زولك زمان أغلي

وواطي عيونك كان شبّت عيني
لاجل زويلك يا عزيز أغني

مانا لبعضنا لا تجوز فديني
وما تقوللي خليك حتى خي

عنّك ان شاء الله ربنا يغنيني
ويغنيك عالعودة بدمع سخي

إنكان علي
لك الإذن عدّي مايهمك شئ
ما اتقول توجعني!!


للشاعر سيف الاسلام عقوب