كل عام وانتم بخير بمناسبة حلول شهر رمضان المبارك
ண حكايات البسباسي ண
الأب يشوف للامساكية من بعيد : لالا قاعدة مايلة يا حلومة رافعي من اليمين شوية
حلومة : من بدري وانت تقولي مايلة مايلة.. خلاص ما عرفتش
الأم : هو رمضان يبدأ الاربعاء ؟
الأب : والله كاتبينه في الامساكيات يوم الاربعاء
الأم : وين عليوه ؟
حلومة : يصلح في البشكليطة
الأب : باهي اللي مش مداير سيارة
الأب : آه معليش يا جماعة خشينالكم في الموضوع طول وما عرفناكم بالعائلة :
هذه زوجتي .. بنتي حلومة، وولدي عليوه اللي يصلح .. وأمي اللي قاعدة اتعانى هي والكليم
حفظتوهم ؟ مش واجدين
الأم : شنو بتتغذوا ؟
الأب : شنو الغذي ؟
الأم : مكرونة
حلومة : ديما مكرونة
الأب : اني ما اتكلمتش آهي حتى حلومة زهقت منها، اني ليش جايبلك بامية معاي بس ؟
الأم : ماهو اللي يجيب البامية يجيب معاها الخبزة
الحاجة تخش عالخط والكلام ليك يا جارة : كان يا وليدي خذيت كلامي ودرتلنا تنور
حتى اللي ما يعرفش يتعلم .
الأم : فكنا من الدخاخين ، والحطب ، ما عندنا ليه مكان
الأب : حطيلنا المكرونة حطي
عليوه : عندك مفتاح 12 في صندوق السيارة يا بوي ؟
الأب : كملتلي مفاتيح اللي تاخذه معاش ترده .
بعد الغذي الوالد اتكي وقعد يستنى في طاسة الشاهي الخضرة .. اللي تخدم فيها الحاجة
الأب : ساد يا حاجة عطينا طاسة
الحاجة : ارفعي الطاسة لبوك يا حلومة
الأب : براوة يا بنيتي .. قوليلي يامي فيه الغاز في رمضان هذا ؟
الحاجة : ان شاء الله .. غير نشطوا روحكم وجاوبوهن
حلومة : اني بنصيم يا بوي
الأم : مازال صغيرة عالصيام
الأب : خليها تصيم .. صيمي من العصر للمغرب
حلومة : بس ؟
الأب : هذا المستوى الأول
عليوه : فكرتني يا بوي .. البلايستيشن يبي تصليح
الأب : وتوه وقت بلايستيشن ؟
عليوه : مش قلت بتصلحه في العطلة .. آهي قريب اتم العطلة وما صلحته
الأب : يفسد على قرايتك خليه للعطلة الجاية
الأم : ناجحلك ممتاز وما تبيشي يلعب حتى في العطلة ؟
الأب : حاضر .. بالك العشية نرفعه اني وياك ، ها يا حويجة ما فيش لغز عالطاير قبل رمضان ؟
الحاجة : مع ان حلاوتهم بعد الفطور .. لكن ما نيش راداتك
الأب : ها شنو صار
الأم : وسع بالك خليها تفكر
الحاجة : أيوه ..
( ضيف صاحب البيت ما تلقاه .. وين شافه عرف اسماه .. طفا النور وتذكر صباه )
الأحد ديسمبر 15, 2019 10:18 am من طرف عاطف0
